Ulttyq ekonomika ministri Rýslan Dálenov eldiń 2020-2024 jyldarǵa arnalǵan áleýmettik-ekonomikalyq damý boljamyn tanystyrdy, dep habarlaidy Sputnik Qazaqstan.
Úkimet syrtqy faktorlardyń ózgerýine bailanysty Qazaqstan ekonomikasy damýynyń yqtimal úsh stsenariiin qarastyrǵan. Boljam men biýdjettik parametrlerdi qalyptastyrý úshin bazalyq stsenarii negizge alyndy. Munai baǵasy 55 dollar dep kórsetilgen.
"Jalpy ishki ónimniń naqty ósimi 2020 jyly 4,1% deńgeiinde boljanyp otyr. 2024 jyly ol 4,7%-ke jetedi. Ortasha jyldyq ósý qarqyny bes jylda 4,4%-ti quraidy", - dedi ministr úkimet otyrysynda.
Aitýynsha, salalyq bóliniste negizgi ósim shikizattyq emes sektorǵa tiesili bolady. Bul óńdeý ónerkásibi, qyzmet kórsetý salasy jáne qurylys. Bul salalardyń ortasha ósimi 4,7%-ti quramaq.
"2020 jyly munai óndirý kólemi 90 million tonnaǵa, 2024 jyly 100 million tonnaǵa deiin ósedi", - dedi Dálenov.
Munai óndirý kólemi Teńiz, Qarashyǵanaq, Qashaǵan ken oryndaryn keńeitý, sondai-aq teńizdegi ken oryndaryn paidalanýǵa berý esebinen artady.
Nominaldy jalpy ishki ónim 2020 jyly 75 trillion teńgeni, al 2024 jyly - 106 trillion teńgeni quraidy. Jan basyna shaqqandaǵy jalpy ishki ónim 2020 jyly 10,5 myń dollardy qurasa, 2024 jyly ol 14,3 myń dollarǵa deiin ulǵaiady.
"2020-2021 jyldary infliatsiianyń jyldyq nysanaly dálizi 4,0-6,0% deńgeiinde saqtalady. Al 2022-2024 jyldary 3,0-5,0% sheginde bolady. Jumyssyzdyq 2024 jyly 4,7%-ke deiin tómendeidi", - dedi ministr.
Osy parametrlerdi esepke ala otyryp, respýblikalyq biýdjettiń shyǵystary 2020 jyly 12,7 trillion teńge, 2021 jyly 13,2 trillion teńge, 2022 jyly – 13,6 trillion teńge kóleminde belgilendi.
