Dalada jumys isteitin eńbek adamdaryna kóbirek kóńil bólinse eken. Prezident Qasym-Jomart Toqaevtyń málimdemesine orai aqyn, Memlekettik syilyqtyń iegeri, Qazaqstan Jazýshylar odaǵy BQO bólimshesiniń tóraiymy Aqushtap Baqtygereeva osylai aitty, dep habarlaidy QazAqparat.
Aqynnyń aitýynsha, Memleket basshysynyń málimdemesinde kóp másele aityldy. Tek sony jergilikti bilik oryndary oryndai bilýi kerek.
«Ásirese, qazirgidei kezeńde dalada egin salyp, mal baǵyp otyrǵan sharýa qojalyqtaryna barynsha qoldaý kórsetilse deimin. Ózim biletin sharýa adamdaryna ótken jyly demeýqarjy berilgen joq. Ekonomika turalaidy dep álem shýlap, dabyl qaǵyp jatqan mezgilde bizdiń dalamyz nazardan tys qalmaýy kerek. Jumyssyzdyq beleń almas úshin qoldan kelgenniń bárin jasaý qajet», dedi Aqushtap Baqtygereeva.
Taǵy bir túitkildi másele – mektep oqýshylaryn qashyqtan oqytý jaiy. Aýyldarda internettiń durys jolǵa qoiylmaǵany belgili. Sondai jaǵdaida balalardy qalai oqytpaqshymyz? Bul da – oilanatyn másele.
«Barsha aǵaiynǵa aitarym, qazir bárimiz úshin, urpaǵymyz syn saǵaty týyp tur. Úiden shyqpa dese, shyqpasqa kerek. Bul – eshqandai dárige, ǵylymǵa ál bermei jatqan indet. Endeshe, sodan aman qalýdy oilaý kerek. Bálkim, qaiyrymdylyq, bálkim, ózińdi óziń syilaý mádenietiń, bálkim, meditsinalyq saýattylyǵyń, tazalyqty saqtai bilýiń kómekteser. Qydyrýdy qoiaiyq, orynsyz júrýdi doǵaraiyq. Óz úiimizdiń qadirin bileiik. Tańda turyp, «Balam, qaliń qalai?» deiik, «Anam, qaliń qalai?» deiik bir-birimizge. Úkimetimizdiń aitqanyn isteiik. Tártipke kóneiik, taǵdyrǵa baǵynaiyq, uly kúshti moiyndaiyq. Ainalaiyn halqym, abai bolaiyq!», dedi aqyn.
Aita keteiik, keshe Prezident Qasym-Jomart Toqaev respýblikalyq telearnalar efirinen málimdeme jasaǵan bolatyn.
.jpeg)