Zyrian aýdanyna jasaǵan issapary barysynda oblys ákimi Danial Ahmetov óńir ortalyǵyndaǵy kóptegen kóshelerdiń ataýlary áli de «qyzaryp» turaǵanyn aityp, olardy ózgertý qajettigin alǵa tartty.
Aimaq basshysy kezinde ózi dekommýnistik partiia qatarynda bolǵanymen, ótken ǵasyrdyń basyndaǵy aýqymdy saiasi qýǵyn-súrginge naq osy «qyzyldardyń» kináli ekenin atap kórsetti. Bul týraly altaynews.kz habarlady.
– Lenin, Kirov, Ordjonikidze, Dzerjinskii degen sekildi ataýlarǵa nelikten jabysyp qaldyq? Naq osy «qairatkerlerdiń» kesirinen milliondaǵan adamdar qyryldy. Biz óskeleń urpaqty dostyqqa, táýelsizdikke baýlýymyz kerek. Endeshe kóshelerdi Dostyq, Táýelsizdik dep ataiyq. Bizge óz zamanymyzdyń qaharmandaryn dáripteý qajet. Aitalyq, Saǵadat Nurmaǵambetov osyndai qurmetke ábden laiyq. Zyriannyń ózinen shyqqan qanshama soǵys batyrlary bar. Ulylarymyz – Abai, Áýezov bar, Jambyl bar, Lermontov pen Pýshkin bar.Qanshama dańqty jerlesterimizdiń – jumysshylar men injenerlerdiń, muǵalimder men dárigerlerdiń esimderi eskerýsiz qalyp jatyr. Osy baǵytta jumys isteiik, – dedi Danial Ahmetov.
Zyrian qalasy kósheleriniń ataýlary aýystyryla bastady. Jýyrda 28 kóshe ózgertilmek.
Jergilikti qoǵamdyq keńestiń usynysyna sai, Sovetskaia Táýelsizdik, Lenin Astana bolyp aýyspaqshy.
Leninogorskaia – Shieli, Komsomolskaia– Zyriannan shyqqan Keńes odaǵynyń batyry Pavel Koltsov dep ózgertilýi yqtimal.
Kanavnaia, Proletarskaia, Voroshilov kósheleri Bastaý, Sport, Eńbek kósheleri atanbaq, Sovetskaia tuiyq kóshesi Kóleńkeli bolyp ózgermekshi.
Eń bastysy qalanyń óz ataýyn aýystyrý máselesi de qaralýda, kenshiler qalashyǵy Altai atanýy múmkin.
