Toqaev byltyr Qazaqstannyń BRIKS elderimen saýdasy 45 milliard dollardan asqanyn atap ótti. Onyń pikirinshe, aldaǵy jyldary bul kólemdi ulǵaitýǵa múmkindikter kóp.
"Qazirgi álem daǵdarysta. Ol buryn-sońdy bolmaǵan geosaiasi jáne ekonomikalyq turaqsyzdyqpen betpe-bet kelip otyr. Jahandyq azyq-túlik jaǵdaiy nasharlap barady. Eger jahandyq azyq-túlikti jetkizý tizbegi nasharlai berse, milliondaǵan adamnyń ómirine qaýip tónedi", - dedi Prezident "BRIKS pliýs" formatyndaǵy jahandyq damý boiynsha joǵary deńgeidegi dialogta sóilegen sózinde.
Qasym-Jomart Toqaev álemdegi tórt iri azyq-túlik óndirýshiniń úsheýi BRIKS-ke múshe ekenin, BRIKS elderindegi aýyl sharýashylyǵynyń jalpy ishki ónimi álemdik JIÓ-niń jartysynan astamy ekenin atap ótti.
"Azyq-túlik daǵdarysyn tiimdi sheshý tolyq kelisilgen halyqaralyq áreketti qajet etedi jáne qysqa merzimdi de, uzaq merzimdi de sharalardy qamtýy kerek. Qazaqstan óziniń orasan zor aýyl sharýashylyǵy áleýetin paidalana otyryp, bul kúsh-jigerge úles qosýǵa daiyn.
Qarjylyq jaǵdaidyń nasharlaýy úlken qaryzy bar elderge, kásipkerlik pen otbasylarǵa aýyr qysym jasap jatyr. Turaqty aqaýlar jaǵdaiynda elder men kompaniialar jahandyq jetkizý tizbegin qaita baǵalaýǵa májbúr.
Qazaqstan Shyǵys pen Batys, Ońtústik pen Soltústik arasyndaǵy ózindik "býferlik naryq" rólin atqara otyryp, ádil úlesin qosa alady. Biz uzaq merzimdi perspektivada ashyq, ádil, ózara bailanysty jáne turaqty jahandyq ekonomikany saqtaýymyz kerek", - dep qosty Memleket basshysy.
Sonymen qatar, Prezident Qazaqstannyń BRIKS elderimen klimattyń ózgerýi problemasyn sheshý úshin tehnikalyq kómek pen áleýetti arttyrý salasynda tyǵyz yntymaqtastyq ornatýǵa nietti ekenin aitty.
"Kópjaqtylyq pen jahandyq basqarýdyń ekzistentsial daǵdarysyna qaramastan, Qazaqstan halyqaralyq institýttar kez kelgen eldiń múmkindiginen tys qaýip-qaterlerge qarsy turýdyń jalǵyz quraly bolyp qala beretinine nyq senedi", - dedi ol.
Toqaev jahandyq seriktestiktiń jańa túrleri konfrontatsiiany almastyrýy kerek dep sanaidy.
"Men "Adamzat taǵdyrynyń ortaq qoǵamdastyǵy" kózqarasyn, sondai-aq Si Tszinpin bastaǵan jahandyq qaýipsizdik jáne jahandyq damý bastamasyn joǵary baǵalaimyn.
Ortalyq Aziianyń lokomotivi retinde Qazaqstan 2030 jylǵa deiingi turaqty damý kún tártibine qarai óńirlik yntymaqtastyqty keńeitýge umtylyp jatyr. Biz Almatyda BUU-nyń Ortalyq Aziia men Aýǵanstan úshin TJM ortalyǵyn qurý ideiasyn ilgeriletýdi jalǵastyramyz. BRIKS+ platformasy bul iske laiyqty úles qosatynyna senimdimin. Qazaqstan óziniń ulttyq múddelerin jahandyq mindettemelerge sáikes keltirýge bel bailap otyr.
Bul daǵdarysty múmkindikke ainaldyratyn kez keldi. Bul jerde bizdiń barlyq kúsh-jigerimiz adamdardy birinshi orynǵa qoiý - moral imperativin basshylyqqa alýy kerek. Biz "sý-energetika-azyq-túlik qaýipsizdigi" qarym-qatynasyna bailanysty shielenisken aimaqtyq táýekelderdi joiýymyz kerek", - dedi Memleket basshysy.
