© Sputnik / Tabyldy Kadyrbekov
Jambyl oblysynda óz-ózine qol jumsaǵan merzimdi qyzmettegi sarbazdyń kiimi men aýzynan bóten adamnyń biomaterialy tabyldy. Kúdikti serjanttyń advokaty Serjan Piráliev jaǵa ustatarlyq faktilerdi jariia etti, dep habarlaidy Sputnik Qazaqstan.
Jambyl oblysynyń shekarasynda áskeri boryshyn ótegen 18 jastaǵy Bekbol Mirash 2022 jyldyń tamyzynda at qoradan óli tabyldy.
Osydan keiin bólim komandiri qamaýǵa alynyp, oǵan qatysty "aýyr zardaptarǵa ákep soqtyrǵan bilikti asyra paidalaný" baby boiynsha sotqa deiingi tergeý bastaldy.
Advokat Piráliev sot-meditsinalyq saraptama nátijesine sáikes marqumnyń denesinde eki nemese odan da kóp adamnyń DNQ-sy tabylǵanyn, biraq ózi qorǵap jatqan kúdiktiniń DNQ-sy bolmaǵanyn aitty.
"Qorǵaýshy taraptyń ótinishi boiynsha birqatar saraptama taǵaiyndaldy. Eń bastysy, biologiialyq saraptama jasaldy. Olar marqumnyń aýyz qýysynan, sondai-aq ish kiiminen, marqumnyń fýtbolkasynan sháýet izderin tapty. Sodan keiin DNQ taǵaiyndaldy. Meniń qorǵaýshymnyń sháýeti marqumnyń denesinen, kiimderinen tabylmady. Sondai-aq qan toptary sáikes keletin basqa áskeri qyzmetshilerge qatysty DNQ saraptamasyn júrgizý týraly ótinish boldy. Jaqynda DNQ saraptamasynyń nátijesi alyndy, onda ish kiimde, fýtbolkada marqumnyń ǵana emes, sonymen qatar eki nemese odan da kóp er adamnyń DNQ-sy bolǵany anyq kórsetilgen. Solardyń biri – marqumnyń jaqyn áriptesi jáne dosy", - deidi advokat Serjan Piráliev.
Qorǵaýshy tarap qatardaǵy jaýyngerge qatysty qarýlastary tarapynan jynystyq sipattaǵy áreketter jasalǵan bolýy múmkin dep sanaidy.
Alaida advokattyń qalǵan áskeri qyzmetshilerge qatysty DNQ saraptamasyn júrgizý týraly ótinishi qanaǵattandyrylmady. Advokat áskeri basqarmanyń bul nusqany qarastyrǵysy kelmeitinin jáne qylmystyq isti tezirek aiaqtaǵysy keletinin aitty.
Esterińizge sala keteiik, Jambyl oblysynda 2022 jyldyń tamyz aiynyń sońynda merzimdi qyzmettegi áskeri qyzmetshi sýitsid jasady. Keiin sarbazdyń ólimine bailanysty kúdikti ustaldy.
