"Jýrnalisterdi qorǵaý komiteti" (Committee to Protect Journalists, CPJ) Resei biligin koronavirýs indeti týraly habar taratqan aqparat quraldaryna tsenzýra jasamaýǵa shaqyrdy.
Shtab-páteri Niý-Iorkte shoǵyrlanǵan uiymnyń aitýynsha, Roskomnadzor keminde eki aqparat quralynan maqalalaryn alyp tastaýdy talap etip, talapty oryndamasa, aiyppul salatynyn eskertken.
Uiymnyń dereginshe, Roskomnadzor atap aitqanda "Eho Moskvy" radiostantsiiasynan Kreml synshysy ári saiasatkermen suhbatty alyp tastaýdy suraǵan. Suhbatta saiasattanýshy Resei biliginiń koronavirýspen kúres strategiiasyn synap, ony 1986 jylǵy Chernobyl AES-iniń apatqa ushyraǵan kezdegi sovet biliginiń tiimsiz áreketimen salystyrǵan.
Roskomnadzor "koronavirýs týraly jalǵan aqparatpen kúresip jatqanyn" alǵa tartyp, radiostantsiiany maqalany alyp tastaýǵa májbúrlegen. Biraq buiryqta naqty qai aqparattyń jalǵan ekeni kórsetilmegen. Saiasattanýshy Valerii Soloveige 100 myń rýbl kóleminde (shamamen 1300 dollar) aiyppul salǵan.
"Govorit Magadan" saitynyń bas redaktory Tatiana Brais ta biliktiń "koronavirýs infektsiiasynan qaitys bolýy múmkin" delingen Sibir turǵynynyń ólimi týraly materialdy alyp tastaýdy talap etkenin aitady.
