23 shildede Qazaqstanda 6 521 adamnyń koronavirýsqa tapsyrǵan analizi oń nátije kórsetken. Eldiń eń iri eki qalasy Nur-Sultan men Almatyda virýs juqtyrǵandar sany myńnan asyp tur. Astanada - 1522, al Almatyda – 1080 adam koronavirýs infektsiiasyn juqtyrǵan. Basqa óńirlerdegi kórsetkishter:
Shymkent qalasy - 507, Aqmola oblysy - 193, Aqtóbe oblysy - 250, Almaty oblysy - 220, Atyraý oblysy - 446, Shyǵys Qazaqstan oblysy - 101, Jambyl oblysy - 108, Batys Qazaqstan oblysy - 309, Qaraǵandy oblysy - 750, Qostanai oblysy - 167, Qyzylorda oblysy - 170, Mańǵystaý oblysy - 255, Pavlodar oblysy - 211, Soltústik Qazaqstan oblysy - 123, Túrkistan oblysy - 109.
Byltyrǵy naýryzdan beri jalpy el boiynsha 522 638 adam Covid-ke shaldyqqan.
Jańa antirekord Qazaqstan densaýlyq saqtaý ministri Aleksei Tsoidyń 14 shildede aitqan pessimistik stsenariiniń oryn alyp jatqanyn rastaidy. Ministr shilde-qyrkúiek ailarynda Qazaqstanda 400 myńǵa jýyq adam koronavirýs infektsiiasyn juqtyrady, tamyzdaǵy sharyqtaý shegi kezinde táýligine 6 myńnan astam jańa naýqas tirkelip otyrady dep boljaǵan. Tamyz aiy bastalmai jatyp, bir táýlikte juqtyrǵandar sany 6,5 myńnan asyp ketti.
Resmi málimet boiynsha, 22 shildede 225 adamǵa "koronavirýs belgileri bar pnevmoniia" diagnozy qoiylǵan. Byltyr tamyzdan bergi sanaq boiynsha, PTR analizi Covid-tiń baryn rastamasa da, klinikalyq belgileri boiynsha "koronavirýs pnevmoniiasy" diagnozy qoiylǵandar sany 53 886 adamǵa jetken.
22 shildede 64 adam koronavirýstan, 10 adam "koronavirýstekti pnevmoniiadan" kóz jumǵan.
Jańa naýqas sany emdelip shyqqandardan eki esedei kóp. Ótken táýlikte Qazaqstanda 2 802 adam koronavirýstan emdelip shyqqan.
Qazir elde 75 myńdai adam koronavirýs infektsiiasynan emdelip jatyr, olardyń ishinde 21 681 patsient statsionarda. 1 325 naýqastyń jaǵdaiy aýyr, 287-siniń hali óte aýyr, al 175 adam ókpe jeldetkish apparatqa qosylǵan.
Indettiń órshýine bailanysty Qazaqstannyń kóp aimaǵynda karantin kúsheitilgen. Nur-Sultanda infektsiialyq aýrýhanalar 72 paiyzǵa tolyp, josparly emdeý toqtaǵan. Qazaqstan aimaqtaryndaǵy epidemiia matritsasy boiynsha tek Túrkistan oblysy "sary aimaqta" qaldy, qalǵan óńirdiń bári eń qaýipti degen "qyzyl aimaqqa" ótti.
