QR densaýlyq saqtaý vitse-ministri Lázzat Aqtaeva COVID-19 juqtyrǵan meditsina mamandaryna tólemaqy qalai taǵaiyndalatynyn túsindirdi, dep habarlaidy QazAqparat.
«Koronavirýs infektsiiasyn juqtyrǵan meditsinalyq mamandarǵa tólemaqy taǵaiyndaý boiynsha Densaýlyq saqtaý ministrligi men Eńbek jáne halyqty áleýmettik qorǵaý ministrligi birlesken buiryq shyǵardy. Onda koronavirýspen kúreske tikelei qatysqan mamandarǵa tólemaqy berý algoritmi jazylǵan. Basty negizdeme - mamannyń aýrý juqtyrý faktisin habarlaý», - dedi vitse-ministr Ortalyq kommýnikatsiialar qyzmetinde ótken brifingide.
Habarlaýdan keiin infektsiialyq aýrý oshaǵyn anyqtaý úshin epidemiologiialyq tekserý júrgiziledi.
«Tekserý nátijesi arnaiy komissiiaǵa jiberiledi. Bul komissiia quramyna eńbek inspektsiiasy ókilderi, jumys berýshi ókili, sanitarlyq-epidemiologiialyq uiym ókilderi jáne qyzmetkerdiń nemese kásipodaq uiymynyń ókilderi kiredi. Atalǵan buiryq kúshine endi jáne jaqyn arada jumysyn bastaidy», - dedi L. Aqtaeva.
Vitse-ministrdiń aitýynsha, qazirgi ýaqytta Qazaqstannyń 13 óńirinde 370 meditsinalyq qyzmetker COVID-19 juqtyrǵan. Olardyń 28 paiyzy - dárigerler, 48 paiyzy - medbikeler jáne 23 paiyzy - kishi meditsinalyq qyzmetkerler.
Eske sala ketsek, naýryz aiynyń sońynda TJ rejimin qamtamasyz etý jónindegi Memlekettik komissiia epidemiiaǵa qarsy sharalarǵa atsalysqan meditsinalyq qyzmetkerlerge ústemeaqy taǵaiyndady.
Qaýiptiligi boiynsha birinshi top mamandarynyń jalaqysyna aiyna 850 myń teńge ústemeaqy qosylady. Ekinshi top - provizorlyq statsionar men jedel járdem qyzmetteriniń dárigerleri, orta jáne kishi meditsina qyzmetkerleri. Olardyń ústemeaqysy aiyna 425 myń teńgeni quraidy. Úshinshi topqa karantindik statsionar dárigerleri, orta jáne kishi meditsina qyzmetkerleri, sanitarlyq dárigerler, jedel járdem júrgizýshileri jáne taǵy basqalary kiredi. Olar aiyna 212 myń teńge ústemeaqy alady.
