QR Densaýlyq saqtaý ministri Eljan Birtanov koronavirýs infektsiiasymen kúres boiynsha elimizde engizilgen karantin sharalarynyń nátijesin aityp berdi, dep habarlaidy "Ult aqparat".
«Ótken aptada naýqastar sanynyń kóbeiýi kún saiyn 30-50 paiyz aralyǵynda qubylyp turatyn. El boiynsha karantin sharalary kúsheitilgen soń, respýblika boiynsha jalpy ósim 9-12 paiyzǵa deiin tómendedi. Bul Úkimet pen óńir ákimderi júrgizgen karantin sharalarynyń tiimdiligin kórsetedi», - dedi ministr Ortalyq kommýnikatsiialar qyzmetindegi brifingte.
Ministr apta basynan beri Almaty men Nur-Sultanda karantin sharalary kúsheitilip, jumyssyz apta jariialanǵanyn eske saldy.
«Aýrý juqtyrý jaǵdailarynyń 30 paiyzy eńbek ujymdarynda tirkelgenin aitqan edik. Jumys oryndary infektsiianyń taralýyna aitarlyqtai yqpal etti. 28 naýryzdan bastap, Nur-Sultanda naýqastar ósimi kúnine 60 jaǵdaidan 15 jaǵdaiǵa deiin tómendedi. Almatyda 8-den 2 jaǵdaiǵa deiin azaidy. Munyń barlyǵy - karantin men oqshaýlanýdyń tiimdi bolýynan. TJ boiynsha memlekettik komissiia sheshimimen Nur-Sultan men Almatydaǵy jumysty toqtatý taǵy bir aptaǵa sozyldy. Bul ekinshi apta eńbek ujymdaryndaǵy, qoǵamdyq oryndardaǵy bailanysty azaityp, inkýbatsiialyq kezeńde júrgen naýqastardy anyqtaýǵa múmkindik beredi», - dedi Eljan Birtanov.
