QR Eńbek jáne halyqty áleýmettik qorǵaý ministri Serik Shápkenov COVID-19 pandemiiasy kezeńinde halyqqa qandai áleýmettik qoldaý kórsetilgenin aityp berdi, dep habarlaidy QazAqparat.
«2020 jyly tótenshe jaǵdai rejimi men karantin engizilgen kezde halyqty qoldaýdyń qosymsha sharalary kórsetildi. Memleket áleýmettik saqtandyrý qorynan alǵash ret áleýmettik tólemder engizdi. Eń aldymen qyzmetin shekteýge bailanysty tabysynan aiyrylǵan azamattar úshin – eń tómengi jalaqy mólsherinde tólemder engizildi. TJ jáne karantin kezeńinde olardy 476 mlrd teńge somasyna 4,6 mln adam aldy», - dedi ministr halyqqa esep berý kezdesýinde.
Sonymen birge, jumysta COVID-19 juqtyrǵan dárigerlerge jáne meditsina qyzmetkerleri qaitys bolǵan jaǵdaida olardyń otbasylaryna tólemder qarastyrylǵan jáne 9,5 myń adam 20,5 mlrd teńge alǵan.
«Budan basqa, ai saiyn áleýmettik jaǵynan osal sanattardaǵy 1 mln-nan astam azamat jalpy somasy 25 mlrd teńgege azyq-túlik jiyntyǵy túrinde qoldaý aldy. Infektsiianyń kóbeiý qaýpin azaitý úshin 600 myńnan astam adamǵa ataýly áleýmettik kómek taǵaiyndaldy. Múgedektikti belgileý jáne múgedektigi bar 55,5 myń adamǵa járdemaqy tóleý merzimderi avtomatty túrde uzartyldy», - dedi S. Shápkenov.
