Sársenbi kúni Niý-Iork qalasynyń gýbernatory Endriý Kýomo koronavirýstyń taralýyn ustap turýǵa baǵyttalǵan shekteýlerdiń jańa paketin engizdi, sebebi shtatta aýrý juqtyrý jáne aýrýhanaǵa túsetin adam sany kúrt kóbeigen, dep habarlaidy France 24.
Kýomo bailanys tizbegin baqylaý arqyly shtatta virýstyń taralýyna adamdardyń túngi ýaqytta bar, meiramhana jáne sportzaldarda jinalýy negizgi sebep bolǵanyn anyqtady. Ol shyǵarǵan buiryq boiynsha jabyq ǵimarattarda jumys istep júrgen barlyq barlar, meiramhanalar jáne trenajer zaldary saǵat 22:00-de jabylýy tiis, al is-sharalarǵa jinalatyndardyń sany 10 adamnan aspaýy kerek.
Málimdemede atap ótilgendei, juma kúni kúshine enetin jańa sharalar Kaliforniia men batystaǵy birneshe shtattyń koronavirýstyń tez taralýyn ustap qalý úshin shekteýlerdi qatańdatqanyna bailanysty boldy.
Niý-Iork meri Bill de Blazionyń atap ótýinshe, jeti kúnde qala boiynsha koronavirýs testileriniń oń qorytyndyny anyqtaǵan kórsetkishi 2,52 paiyzdy qurady. Eger bul san 3 paiyzǵa jetse, el boiynsha eń iri memlekettik mektep júiesi syrttai oqý úlgisine aýysady.
Osy arada, Qurama Shtattarda koronavirýs juqtyrý oqiǵalary sanynyń kóbeiýi, aýrýhanaǵa jatqyzý jáne ólim sanynyń ósimine bailanysty ekinshi tolqynnyń kóktemgi órshýden keiin pandemiiany baqylaýǵa ala alǵan soltústik-shyǵys aýdandardy qamti alatynynyń belgileri kóbeigen.
Reuters taldaýyna sáikes, seisenbi kúni Qurama Shtattarda 1450 ólim oqiǵasy tirkeldi, bul tamyz aiynan bastap eń joǵary kórsetkish bolyp tabylady.
AQSh-ta aýrý juqtyrý oqiǵalarynyń sany jeti kún qatarynan kóbeiip, seisenbi sońynda 136 myń adamǵa jetken, al aýrýhanaǵa jatqan adamdardyń sany pandemiia bastalǵaly alǵash ret 60 myń adamnan asty.
