Qurlyqtyq Qytaida ótken táýlikte koronavirýs juqtyrýdyń jańadan 89 jaǵdaiy anyqtaldy, ólim sany tirkelgen joq, - dep habarlaidy «QazAqparat» QHR Gigiena jáne densaýlyq isteri jónindegi memlekettik komitetine silteme jasap.
Bul rette indetke shaldyqqan 86 adam shetelden kelgen. Koronavirýsty elge syrttan ákelý jaǵdailarynyń jalpy sany 1,4 myńnan asty. Qazirgi kezde 905 adam emdelip jatyr, 37 patsient aýyr halde.
Budan basqa, sońǵy táýlikte aýrý belgileri bolmaǵan 54 jańa oqiǵa anyqtaldy. Jalpy alǵanda, 1 myńnan astam adam meditsinalyq baqylaýda qalyp otyr.
Sońǵy málimetter boiynsha, QHR-da koronavirýsqa shaldyǵýdyń barlyǵy 82 249 oqiǵasy rastalǵan, aýrýdan 3341 adam qaitys boldy, 77 738 adam jazylyp, aýrýhanadan shyǵaryldy. Qazirgi kezde 1170 patsient meditsinalyq mekemelerde em qabyldap jatyr, 116 naýqastyń jaǵdaiy aýyr dep baǵalanýda.
Jergilikti BAQ-tyń habarlaýynsha, Qytai biligi COVID-19 indetine qarsy aktivtelgen vaktsinany klinikalyq synaqtan ótkizýge ruqsat bergen. Ol klinikalyq synaqtardan ótip jatqan eldegi ekinshi jáne álemdegi úshinshi vaktsina bolmaq.
Bul vaktsinany tiisti synaqtardan ótkizýge litsenziiany Ýhan biologiialyq preparattardy zertteý institýty men Beijińdegi Sinovac R&D ǵylymi-zertteý kompaniiasy berdi.
Eske sala keteiik, Qytaida vaktsinalar bes baǵyt boiynsha ázirlený ústinde: nýklein qyshqyldary negizindegi gen-injenerlik vaktsina, inaktivtelgen vaktsina, qaita uiymdastyrylǵan aqýyzdar negizindegi vaktsina, rekombinantty adenovirýstyq vektor negizindegi vaktsina jáne tumaýǵa qarsy tiri vaktsina.
Buǵan deiin jańa tiptegi koronavirýsqa qarsy rekombinatty adenovirýstyq vektor negizindegi vaktsinany klinikalyq zertteý úshin tiisti ruqsatty QHR Áskeri-meditsinalyq akademiiasy alǵan.
Qazaqstanmen shekaradaǵy jaǵdai
Qytaida koronavirýsty syrttan ákelý oqiǵalarynyń kóbeiýine bailanysty Shyńjań-Uiǵyr avtonomiialyq aimaǵyndaǵy «Alashańqai» baqylaý-ótkizý beketinde kedendik jáne shekaralyq baqylaý kúsheitilgen, dep habarlaidy «Sinhýa» agenttigi.
QHR ShUAA-ǵa «Alashańqai» arqyly ótetin barlyq adamdar densaýlyq jaǵdaiy týraly deklaratsiiany usynýǵa mindetti. Adamdardyń dene temperatýrasy únemi ólshenip, kólik quraldary dezinfektsiialanyp turady.
