Senbi, 3 aqpan kúni Qazaqstanda analizinen koronavirýs anyqtalǵan 2054 naýqas tirkelgen. Naýqastardyń osy sanaty boiynsha jeti kisi qaitys bolǵan. Bul týraly 4 sáýirde Qazaqstan densaýlyq saqtaý ministrligi habarlady.
Aldyńǵy kúni 647 naýqas tirkelip, rekord ornaǵan Almaty qalasynda bul joly 572 naýqas anyqtalǵan. Aimaqtar boiynsha, bul – áli de eń joǵarǵy kórsetkish. Qalany qorshai ornalasqan Almaty oblysynda 278 naýqas anyqtalyp otyr. Aldyńǵy kúni 258 bolǵan. Almaty oblysy men qalasyn qosqanda bir kúnde barlyǵy 850 adamnan koronavirýs anyqtalǵan. Bul Qazaqstan boiynsha tirkelgen naýqastardyń 41 paiyzyn quraidy.
El astanasy – Nur-Sultanda 476 adamnan Covid infektsiiasy anyqtaldy. Qalada koronavirýs naýqastar jóninen rekord 31 naýryz kúni ornaǵan. Sol kúni 512 naýqas tirkelgen. Odan keiingi eki kúnde 427 jáne 438 naýqas anyqtalǵan.
Batys Qazaqstan jáne Atyraý oblystarynda 109 jáne 109 naýqas (sol tártippen) tirkelgen. Qalǵan aimaqtarda táýlik ishinde anyqtalǵan naýqas sany júzge jetpeidi.
Ministrlik sondai-aq 3 sáýir kúni koronavirýsqa osyǵan deiin shaldyqqan 1229 adamnyń jazylǵanyn habarlady. Olardyń 437-si Nur-Sultanda, 304-i Almatyda jáne 108-i Aqmola oblysynda.
Osylaisha, analizine koronavirýs anyqtalǵan naýqastardyń jalpy sany 253 107 kisige jetip otyr. Onyń 223 835-i jazylyp shyqqan, 3092-si qaitys bolǵan.
Koronavirýstan qaitys bolǵandar statistikasyna virýs juqtyrǵany rastalǵan, biraq "ózge aýrýdan qaitys boldy" degen myńnan astam kisiniń ólimi kirmegen. Ministrlik bul derekti júieli túrde jariialamaidy, tek jýrnalister suraǵan kezde jaýap beredi. Naýryz aiynda vlast.kz saityna saýalyna 2021 jylǵy 5 naýryzǵa deiin mundai ólim sany 1450-ge jetti dep jaýap bergen.
4 sáýirdegi málimet boiynsha, 27 516 adam koronovirýs infektsiiasynan (26 180 KVI+ jáne 1 336 KVI-) em alyp jatyr.
Onyń ishinde 9 996 patsient - statsionarda, 17 520 naýqas ambýlatoriialyq deńgeide em qabyldaýda.
Koronavirýsqa shaldyqqandar arasynda:
• 398 adamnyń jaǵdaiy aýyr;
• 103 patsienttiń jaǵdaiy óte aýyr;
• 64 naýqas ÓJJ apparatynda jatyr.
Qazaqstan úkimeti byltyr 1 tamyzdan bastap analizinen koronavirýs anyqtalmaǵan, biraq aýrý belgileri boiynsha soǵan uqsaityn koronavirýs pnevmoniiasynyń da esebin júrgizip keledi. Toǵyz aidan astam ýaqyt aralyǵynda pnevmoniianyń bul túrimen 50 815 naýqas tirkelgen. Onyń 48779-y jazylyp shyqqan, 700-i qaitys bolǵan. 1336 naýqas emdelip jatyr.
Amerikalyq Djons Hopkins ýniversitetiniń málimetinshe, dúnie júzinde barlyǵy 130 million 659 myń adamnan koronavirýs anyqtalǵan. Onyń 74 milliony jazylǵan, 2 million 845 myńy qaitys bolǵan. Virýs juqtyrǵany rastalǵandardyń jalpy sany jóninen alǵashqy bestikke AQSh (30,6 mln), Braziliia (12,9 mln), Úndistan (12,4 mln), Frantsiia (4,8 mln) jáne Resei (4,4 mln) kiredi.
Aimaqtar boiynsha koronavirýs juqtyrǵandar sany:
Nur-Sultan qalasy - 476,
Almaty qalasy - 572,
Shymkent qalasy - 63,
Aqmola oblysy - 46,
Aqtóbe oblysy - 82,
Almaty oblysy - 278,
Atyraý oblysy - 100,
Shyǵys Qazaqstan oblysy - 37,
Jambyl oblysy - 25,
Batys Qazaqstan oblysy - 109,
Qaraǵandy oblysy - 84,
Qostanai oblysy - 35,
Qyzylorda oblysy - 38,
Mańǵystaý oblysy - 24,
Pavlodar oblysy - 41,
Soltústik Qazaqstan oblysy - 18,
Túrkistan oblysy - 26.
