COVID-19 pandemiiasyna bailanysty Qazaqstannyń áýe kompaniialary qandai shyǵynǵa ushyrap jatqany jariialandy, dep habarlaidy "Ult aqparat".
Energyprom keltirgen boljamǵa súiensek, áýe baǵytyndaǵy saparlardyń shektelýine bailanysty otandyq áýe kompaniialary 235 mlrd teńge, al áýejailar 24,5 mlrd teńge, «Qazaeronavigatsiia» 28 mlrd teńge joǵaltqan.
«COVID-19 pandemiiasy bizdiń eldiń de, álemniń de kóliktik-logistikalyq sektoryna úlken soqqy jasady. Máselen qazaqstandyq áýe kompaniialardyń naýryz aiyndaǵy jolaýshylar tasymaly 2019 jyldyń naýryzyndaǵy kórsetkishimen salystyrǵanda 32,4 paiyzǵa, al osy jyldyń aqpan aiynyń kórsetkishimen salystyrǵanda 34,6 paiyzǵa, iaǵni 394,57 myń jolaýshyǵa azaiǵan», - dep jazady Energyprom.
Áýe kólikteri úshin jolaýshylar ainalymy naýryz aiynda 46,1 paiyzǵa (ótken jyldyń naýryz aiymen salystyrǵanda), al aqpan aiymen salystyrǵanda 41,6 paiyzǵa quldyraǵan. QR IIDM Azamattyq aviatsiia komitetiniń málimetine sáikes Qazaqstanda koronavirýstyń keń etek alýyna jol bermeý úshin 97 halyqaralyq baǵyt boiynsha reisterdi aptasyna 438-ge deiin (nemese 97 paiyzǵa) qysqartylǵan.
Sonymen qatar, ishki turaqty reisterdiń bárin de toqtatý týraly sheshim qabyldanǵan. Qazirgi ýaqytta el aýmaǵynda turaqty áýe qatynastary múlde joq.
«2020 jyldyń 22 naýryzyna deiin ishki 45 baǵyt boiynsha aptasyna 540 reis (kúnine 77 reis) oryndalyp kelgen edi. Alaida 2020 jyldyń 2 sáýirine qarai Qazaqstannyń qalalary arasyndaǵy turaqty reisterdiń bári toqtatyldy. Halyqaralyq azamattyq aviatsiia uiymynyń (IKAO) boljamyna sensek, 2020 jyldyń alǵashqy jartyjyldyǵynda áýe kompaniialary usynatyn kreslolardyń sany 51 paiyzǵa azaiady. Sonymen qatar tasymaldanatyn jolaýshylardyń sany 500 mln adamǵa qysqarady. Áýe kompaniialarynyń operatsiialyq shyǵyndary 124 mlrd AQSh dollaryna teńesedi. Al Halyqaralyq áýe kóligi qaýymdastyǵy (IATA) jolaýshylarǵa bailanysty sala shyǵyny 2020 jylǵa qarai shamamen 252 mlrd AQSh dollaryna jetetinin boljap otyr», - delingen habarlamada.
Boljamdy málimetterge súiensek Qazaqstanda ákelingen jolaýshylardyń sany naýryz-sáýir ailarynda 70 paiyzǵa azaiady.
