Álemde koronavirýstyń jańa shtamdarynyń paida bolýyna bailanysty Eýropada kezekti shekteý sharalary engizilýde, dep habarlaidy Euronews agenttigi.
Germaniia úkimeti koronavirýs kóp anyqtalyp jatqan memleketterdiń saiahatshylarynyń elge kelýine tyiym salmaqshy. Bul rette tizimde Portýgaliia, Ulybritaniia, OAR, Braziliia siiaqty memleketter tur. Shekaradan ótýge ruqsat tek júk tasymaldaýshylarǵa ǵana berilýi múmkin.
«Bizge tap qazir áreket etý kerek», - dep málimdedi Ishki ister ministri Horst Zeehofer.
«Qolda bar aqparattarǵa qaraǵanda, biz aldaǵy ýaqytta josparymyzǵa sáikes keletin sheshimderdi jalpyeýropalyq deńgeide qabyldai almaimyz. Sondyqtan da biz qazir ulttyq deńgeidegi sharalardy qolǵa alyp jatyrmyz», - dedi ol.
Juma kúni bilik ókilderi ózderiniń naqty ustanymdaryn habardar etedi. Norvegiia óziniń shekarasyn jabatyny týraly málimdedi. Elge kirý tek asa qatty qajettilik týyndaǵanda ǵana ruqsat etiledi. Bilik ókilderi taýar tasymaldaýǵa ruqsat berdi. Sonymen qatar Shvetsiia men Finliandiiadan keletin meditsina mamandarynyń elge kirýine bolady.
Premer-Ministr Erna Sýlberg: «Qańtardyń 29-na qaraǵan túni biz Norvegiiaǵa kirýdiń eń qatań erejelerin engizemiz. Is júzinde shekara bizdiń elimizde turmaityn azamattardyń barlyǵy úshin jabylady», - dedi.
Ol sonymen qatar asa qajetti taýarlar burynǵysynsha Norvegiiaǵa jetkizile beretinin jáne erekshe qajet qyzmet túrleri de kórsetiletinin aitty. Al, eńbek migranttary kelesi aptada elge kele almaidy. Bul tártip eki aptadan soń qaita qaralady.
London bolsa, Birikken Koroldikke Portýgaliiadan, Ońtústik Amerika elderi men Afrika memleketterinen kelýshilerge mindetti karantin engizbek. Adamdar 10 kún boiy meimanhanadan shyqpai jatady. Tártip buzǵandarǵa aiyppul salynady.
Mundaǵy maqsat – Koroldikke jańa jáne óte qaýipti virýs shtamdaryn juqtyrǵandardyń aýrýdy elge taratýynyń aldyn alý. Egjei-tegjeili jospardy bilik ókilderi kelesi aptada usynbaq.
Osyǵan deiin atalǵan talaptardyń Aýstraliia men Jańa Zelandiiada da engizilgeni habarlandy.
