Coursera iri bilim berý platformasynda tegin onlain-oqýǵa ótinimderdi qabyldaý aiaqtalýda. Qazirdiń ózinde 40 myń qazaqstandyq ózderin qyzyqtyratyn kýrstardan ótýde, dep habarlaidy QR Eńbek jáne halyqty áleýmettik qorǵaý ministrligi.
Álemdegi eń tanymal Coursera onlain-oqytý platformasy QR Eńbek jáne halyqty áleýmettik qorǵaý ministrligimen (budan ári – Eńbekmini) jáne «Eńbek resýrstaryn damytý ortalyǵy» AQ-men birlesip qazaqstandyqtar úshin tegin onlain-bilim berýdiń aýqymdy jobasyn iske asyrýda. Joba 31 qazanǵa deiin eseptelgen, alaida uiymdastyrýshylar arasynda kýrstarǵa tirkelý merzimin 2020 jylǵy 14 jeltoqsanǵa deiin jáne óteýsiz negizde oqý merzimin 2021 jylǵy 15 aqpanǵa deiin uzartý týraly ýaǵdalastyqqa qol jetkizildi.
Búgingi tańda 40 myńnan astam azamat 500 kýrs boiynsha bilim alýda. 17 myńnan astam qatysýshy bir mezgilde 2 jáne odan da kóp kýrstarda oqyp jatyr.
Oqytýdyń eń tanymal baǵyttary: biznes, IT jáne kompiýterlik ǵylymdar, tilderdi oqytý, jeke damý jáne derekter týraly ǵylym boldy. 11 myńǵa jýyq qatysýshy biznes-aǵylshyn tiliniń daǵdylaryn jaqsartýda. Python tilinde baǵdarlamalaý daǵdylaryn 7 myńnan astam adam meńgeredi. Qazaqstandyqtar SMM negizderin oqytýdy, jobalarmen jumys jasaýda Agile jáne Scrum paidalanýdy, Adobe Photoshop, ómir isin izdeý negizderin jáne kásipkerlik daǵdylardy jii tańdaidy.
Kýrstarda oqityndardyń eń kóp sany (9,6 myń adam) 31-den 40 jasqa deiingi jas sanatyna kiredi. Budan keiin 26-30 jas aralyǵyndaǵy toptar – 8,5 myń qatysýshy, 21-25 jas aralyǵyndaǵy toptar – 8 myń, 20 jasqa deiingi toptar – 6 myń oqýshy.
Búgingi tańda 8 myńnan astam qatysýshy oqýdy sátti aiaqtap, sertifikat aldy.
Esterińizge sala keteiik, Coursera bilim berý platformasy álemniń jetekshi kompaniialary men ýniversitetterinen (GOOGLE, IBM, Facebook, Stanford University, Yale University, Johns Hopkins University, Princeton University jáne t.b.) 4 myńnan astam tegin kýrstardan ótýge biregei múmkindik beredi. Atalǵan kýrstarda túrli daǵdylardy, sonyń ishinde matematikalyq, kommýnikativtik, kásipkerlik, baǵdarlamalaý, statistikalyq taldaý, derekterdi basqarý jáne kóshbasshylyq daǵdylaryn meńgerýge bolady.
Aǵymdaǵy jylǵy 14 jeltoqsanǵa deiin Elektrondyq eńbek birjasy arqyly ótinim bergender jáne www.coursera.org platformasynda tirkelgenin rastaǵandar úshin Coursera alańynda tegin oqytý kýrstary 2021 jylǵy 15 aqpanǵa deiin qoljetimdi.
