QR DSM Qoǵamdyq densaýlyq saqtaý ulttyq ortalyǵy basqarma tóraǵasynyń orynbasary Ainagúl Qýatbaeva «Jýrnalistika meditsinalyq mektebi» jobasynyń onlain-lektoriiasynda Pfizer/Biontech kompaniiasynyń Comirnaty preparatymen balalardy vaktsinalaý týraly jii qoiylatyn suraqtarǵa jaýap berdi, dep habarlaidy QazAqparat.
Ásirese eń ózektisi – vaktsina qandai da bir aýrýlardy, atap aitqanda, qaterli isik, qant diabeti nemese aýtizm siiaqty genetikalyq aýytqýdy týdyrmai ma degen suraq boldy.
«Comirnaty/Pfizer vaktsinasy qaterli isikke de, diabetke de, aýtizmge de ákelmeidi. Sondai-aq, bul basqa sozylmaly aýrýlardyń órshýine yqpal etpeidi jáne vaktsinalaý qant diabeti, qaterli isik siiaqty sozylmaly aýrýlary bar adamdarǵa qajet, óitkeni mundai adamdarda COVID-19 óte aýyr ótedi», - dedi dáriger.
Sarapshynyń aitýynsha, Comirnaty/Pfizer vaktsinasynyń bir dozasynyń quramynda kapsýlalanǵan nanobólshekter qabyǵynda 30 mikrogramm RNQ nemese ribonýklein qyshqyly bar.
«Bul RNQ aqparat adamnyń DNQ-syna ene almaidy, ol naqty antidenelerdiń túzilýin yntalandyrady jáne orta eseppen 72 saǵattan keiin deneden joǵalady», - deidi sarapshy.
Esterińizge sala keteiik, Dúniejúzilik densaýlyq saqtaý uiymy Pfizer kompaniiasynyń Comirnaty vaktsinasyn 12-18 jas aralyǵyndaǵy balalar men jasóspirimderdi, júkti jáne bala emizetin analardy vaktsinalaý úshin usynǵan. Bul preparat klinikalyq synaqtardyń barlyq satylarynan ótip, qaýipsizdiktiń joǵary deńgeiin rastaidy jáne osy áleýmettik toptarda qoldaný úshin maquldanǵan.
