Mobildi, qarqyndy ómir. Árkim asyǵys, kezdesýler qysqa, áńgimeler ústirtin. Kóp adam kún sońynda tynyshtyq izdeidi. Sol tynyshtyqty qolyndaǵy telefon, noýtbýgynan tabýǵa tyrysady.
Áleýmettik jeliler ýaqytsha serikke ainaldy. Bireýdiń jazbasyna pikir qaldyrý, oi bólisip, laik basý, kún taqyrybyn birge talqylaý bári adam kóptiń ortasynda júrgendei áser qaldyrady. Ózin mańyzdy sezindiredi. Másele – virtýaldy bailanystyń birtindep tiri qarym-qatynastyń ornyn basyp bara jatqanynda.
Biraq qolyndaǵy gadjettiń ekrany sóngen sátte adamnyń miynda bári ózgeredi. Únsizdik, jalǵyzdyq anyq seziledi. Álemjelide qanshama pikirtalas, jyly sóz almasý bolǵanmen, tiri adamnyń jylýyn eshqaisysy almastyra almaidy. Múmkin tsifrlyq dáýirdiń eń úlken paradoksy da osy shyǵar... Adamzat eshqashan bir-birine sonshalyq jaqyn jáne kóp adamnyń ortasynda sonshalyq jalǵyz bolmaǵan siiaqty.
Abzalynda
Biz qanshalyq jeke shekaramyzdy bekitip, adamdardan alshaqtap, áleýmettik jelilermen ózimizdi aldasaq ta, adam jany báribir shynaiy adami qarym-qatynasqa muqtaj ekenin moiyndaýymyz kerek. Sondyqtan sanaly túrde adamdarǵa jaqyn bolýǵa umtylǵan jón. Ómirde bar qatynasty saqtap, damytýmen jumys istegen abzal. Ol úshin keide telefondy bir shetke qoiyp, tipti kei kúnderi áleýmettik jelilerden detoks jasaǵan durys. Aýyl aralap, qalaǵa shyǵyp, adamdardy baqylap, naǵyz ómirdiń qandai bolatynyn ózimizge eske salyp otyrǵan jaqsy. Jaqyn adamyńyzǵa habarlasyp, ata-anańyzdyń halin surap, dosyńyzben kezdesip áńgime aityp, saiabaqtarda qoltyqtasyp, qolustasyp júrip aralasqan ádemi. Osyndai qarapaiym sátter, tiri adammen qatynas qana shynaiy sezim, este qalarlyq jylýlyq pen jaqyndyq sezimin syilaitynyn árdaiym basshylyqta ustaǵan jón.
