Britaniia kino jáne televiziia óneri akademiiasy (BAFTA) "Chernobyl" mini-serialyn úzdik dep tapty. Chernobyl atom elektr stantsiiasyndaǵy 1986 jylǵy sáýirde bolǵan jarylys týraly bes-seriialy film on tórt nominatsiianyń jeteýin jeńdi.
Britan akteri Djared Harris "úzdik er adam róli" nominatsiiasy boiynsha "Qola maska" syilyǵyn aldy. Ol akademik Valerii Legasovtyń rólin somdaǵan. Serialdyń rejisseri Iohan Renk, Hilde Gýdnadottir, kompozitory, kostiým jónindegi sýretshisi Odil Diks-Miro de marapat alǵandar qatarynda. Britaniia akademikteri sondai-aq serialdyń montajyn, dekoratsiiasyn, jaryq qoiýshylary men operatorlaryn atap ótti.
Amerikalyq HBO telearnasy men britaniialyq Sky UK kompaniiasy túsirgen "Chernobyl" mini-serialy 2019 jyly kóktemde jaryq kórgen. Film Ýkrainadaǵy Chernobyl atom elektr stantsiiasyndaǵy 1986 jylǵy jarylys pen stantsiia mańyndaǵy Pripiat qalasy turǵyndary tartqan zardapty, Sovet basshylarynyń bir jaǵynan apat saldaryn joiyp, ekinshi jaǵynan aqparatty álemnen jasyrǵanyn baiandaidy.
Serial belarýs jazýshysy Svetlana Aleksievichtiń "Chernobyl duǵasy: bolashaqtyń hronikasy" kitabyndaǵy áńgimeler jelisimen túsirilgen.
2019 jyldyń maýsymynda serial IMDB reitinginde serial tarihyndaǵy eń úzdik týyndy atandy. Serial BAFTA premiiasynan bólek kóptegen ózge syilyqtardy jeńip alǵan. Biyl qańtarda ol amerikalyq "Altyn globýs" júldesin aldy.
