بريتانييا كينو جەنە تەلەۆيزييا ٶنەرٸ اكادەميياسى (BAFTA) "چەرنوبىل" ميني-سەريالىن ٷزدٸك دەپ تاپتى. چەرنوبىل اتوم ەلەكتر ستانتسيياسىنداعى 1986 جىلعى سەۋٸردە بولعان جارىلىس تۋرالى بەس-سەرييالى فيلم ون تٶرت نوميناتسييانىڭ جەتەۋٸن جەڭدٸ.
بريتان اكتەرٸ دجارەد حارريس "ٷزدٸك ەر ادام رٶلٸ" نوميناتسيياسى بويىنشا "قولا ماسكا" سىيلىعىن الدى. ول اكادەميك ۆالەريي لەگاسوۆتىڭ رٶلٸن سومداعان. سەريالدىڭ رەجيسسەرٸ يوحان رەنك, حيلدە گۋدنادوتتير, كومپوزيتورى, كوستيۋم جٶنٸندەگٸ سۋرەتشٸسٸ وديل ديكس-ميرو دە ماراپات العاندار قاتارىندا. بريتانييا اكادەميكتەرٸ سونداي-اق سەريالدىڭ مونتاجىن, دەكوراتسيياسىن, جارىق قويۋشىلارى مەن وپەراتورلارىن اتاپ ٶتتٸ.
امەريكالىق HBO تەلەارناسى مەن بريتانييالىق Sky UK كومپانيياسى تٷسٸرگەن "چەرنوبىل" ميني-سەريالى 2019 جىلى كٶكتەمدە جارىق كٶرگەن. فيلم ۋكرايناداعى چەرنوبىل اتوم ەلەكتر ستانتسيياسىنداعى 1986 جىلعى جارىلىس پەن ستانتسييا ماڭىنداعى پريپيات قالاسى تۇرعىندارى تارتقان زارداپتى, سوۆەت باسشىلارىنىڭ بٸر جاعىنان اپات سالدارىن جويىپ, ەكٸنشٸ جاعىنان اقپاراتتى ەلەمنەن جاسىرعانىن باياندايدى.
سەريال بەلارۋس جازۋشىسى سۆەتلانا الەكسيەۆيچتٸڭ "چەرنوبىل دۇعاسى: بولاشاقتىڭ حرونيكاسى" كٸتابىنداعى ەڭگٸمەلەر جەلٸسٸمەن تٷسٸرٸلگەن.
2019 جىلدىڭ ماۋسىمىندا سەريال IMDB رەيتٸنگٸندە سەريال تاريحىنداعى ەڭ ٷزدٸك تۋىندى اتاندى. سەريال BAFTA پرەميياسىنان بٶلەك كٶپتەگەن ٶزگە سىيلىقتاردى جەڭٸپ العان. بيىل قاڭتاردا ول امەريكالىق "التىن گلوبۋس" جٷلدەسٸن الدى.
