Chernobyl atom elektr stantsiiasynyń burynǵy direktory Viktor Briýhanov qaitys boldy, dep habarlaidy Azattyq.
Ol stantsiiaǵa nysan salynǵaly beri jetekshilik etip, 1986 jyldyń 26 sáýirindegi iri apatqa deiin basqarǵan.
Briýhanov 84 jasynda dúnieden ótti. Onyń qazasy jóninde habarlamany Chernobyl AES baspasóz qyzmeti taratty.
"Kásiporyn ujymy men ákimshiligi marqumnyń týystary men jaqyndaryna qaiǵyryp kóńil aitady" delingen habarlamada.
Briýhanovtyń qai jerde, qandai jaǵdaida qaitys bolǵany belgisiz. Onyń Kievte turǵany belgili.
Viktor Briýhanov Chernobyl atom elektr stantsiiasyna nysan salynǵanǵa deiin iaǵni, 1970 jyly basshy bolyp taǵaiyndalǵan. Áýeli nysan qurylysyna jetekshilik etti, keiin stantsiiany da basqardy. Atom elektr stantsiiasynyń tórtinshi energoblogy jarylyp, AES tarihynda eń iri apat bolǵan kezde ol basshylyqtan shettetildi. Keiin sotqa tartylyp, on jylǵa bas bostandyǵynan aiyryldy. Úkim shyqqannan keiin bes jyldan soń – 1992 jyly merziminen buryn bosap shyqty.
Jarylys bolǵannan keiin alǵashqy saǵattarda Briýhanov apattyń aýqymyn durys baǵalamaǵan. Muny onyń sovet basshylyǵyna bergen túsiniktemelerinen aiqyn baiqaýǵa bolady. Biyl sáýir aiynda Ýkraina qaýipsizdik qyzmeti Chernobyl apatyna bailanysty qupiia qujattardy jariialaǵan. Arasynda Briýhanovtyń baiandamasy da bar. Ol sol kezde Pripiat qalasynda jaǵdai qalypty, radiatsiia deńgeii baqylaýda dep jazǵan.
Briýhanov álemge tanylǵan "Chernobyl" (2019) miniserialynyń keiipkerine ainaldy. Onyń rólin akter Kon O'Nil somdaǵan.
