19 aqpanǵa qaraǵan túni 2019/20 jylǵy ÝEFA Chempiondar ligasy 1/8 finalynyń alǵashqy oiyndary ótti, dep habarlaidy "Ult aqparat".
Dortmýndta «Borýssiia» Frantsiianyń juldyzdy «Pari Sen-Jermen» komandasyn qabyldady. Oiyn kópshilik kútkendei, qonaqtardyń joiqyn shabýyldarymen bastaldy. Biraq olar 1-taimda gol soǵý bylai tursyn, qaqpaǵa soqqy baǵyttaýǵa múmkindik taba alǵan joq. Esesine 2-taimnyń 69-minýtynda «aralardyń» 19 jastaǵy daryndy shabýylshysy norvegiialyq Árliń Bráýt Holann esep ashty. 75-minýtta Tomas Týhel shákirtteri soǵan sai jaýap berdi: Kilian Mbappe úsh qorǵaýshyny aldyp ótip, ońtaily orynda turǵan Neimarǵa pas berdi. Al braziliialyq shabýylshy bos qaqpaǵa esh qiyndyqsyz gol saldy. Biraq arada eki minýt óter-ótpeste Holann alystan shirene teýip, esepti eselei tústi.
Qarymta oiyndy parijdikter óz alańynda ótkizedi. Jankúierleri qoldap turǵanda, búgingi 2-1 esebindegi jeńilisten keiin de olardyń shirek finalǵa shyǵý múmkindigi az bolmas. Biraq búgin sary qaǵaz alýyna bailanysty, Parijdiń eki beldi oiynshysy – Marko Verratti men Toma Móne kelesi oiynǵa qatysa almaidy.
Osy oiynmen qatar, Madridtegi «Vanda Metropolitano» stadionynda jergilikti «Atletiko» men Chempiondar ligasynyń qazirgi jeńimpazy, Angliianyń «Liverpýl» komandasy baq synasty. Bul oiynda «Atletiko» óz stilinde jeńiske jetti. 4-minýtta Saýl Niges esep ashty. Ary qarai, «úndister» Iýrgen Klopp shákirtterin óz qaqpasyna jolatqan joq. Qaita ózderi aragidik qarsy shabýyldar jasap otyrdy. Oiyn taǵdyryn erte soǵylǵan sol jalǵyz gol sheshti.
Búgin jankúierlerdi «Atalanta» - «Valensiia», «Tottenhem Hotspýr» - «Red Býll Leiptsig» oiyndary kútip tur.
