19 اقپانعا قاراعان تٷنٸ 2019/20 جىلعى ۋەفا چەمپيوندار ليگاسى 1/8 فينالىنىڭ العاشقى ويىندارى ٶتتٸ, دەپ حابارلايدى "ۇلت اقپارات".
دورتمۋندتا «بورۋسسييا» فرانتسييانىڭ جۇلدىزدى «پاري سەن-جەرمەن» كومانداسىن قابىلدادى. ويىن كٶپشٸلٸك كٷتكەندەي, قوناقتاردىڭ جويقىن شابۋىلدارىمەن باستالدى. بٸراق ولار 1-تايمدا گول سوعۋ بىلاي تۇرسىن, قاقپاعا سوققى باعىتتاۋعا مٷمكٸندٸك تابا العان جوق. ەسەسٸنە 2-تايمنىڭ 69-مينۋتىندا «ارالاردىڭ» 19 جاستاعى دارىندى شابۋىلشىسى نورۆەگييالىق ەرليڭ برەۋت حولانن ەسەپ اشتى. 75-مينۋتتا توماس تۋحەل شەكٸرتتەرٸ سوعان ساي جاۋاپ بەردٸ: كيليان مباپپە ٷش قورعاۋشىنى الدىپ ٶتٸپ, وڭتايلى ورىندا تۇرعان نەيمارعا پاس بەردٸ. ال برازيلييالىق شابۋىلشى بوس قاقپاعا ەش قيىندىقسىز گول سالدى. بٸراق ارادا ەكٸ مينۋت ٶتەر-ٶتپەستە حولانن الىستان شٸرەنە تەۋٸپ, ەسەپتٸ ەسەلەي تٷستٸ.
قارىمتا ويىندى پاريجدٸكتەر ٶز الاڭىندا ٶتكٸزەدٸ. جانكٷيەرلەرٸ قولداپ تۇرعاندا, بٷگٸنگٸ 2-1 ەسەبٸندەگٸ جەڭٸلٸستەن كەيٸن دە ولاردىڭ شيرەك فينالعا شىعۋ مٷمكٸندٸگٸ از بولماس. بٸراق بٷگٸن سارى قاعاز الۋىنا بايلانىستى, پاريجدٸڭ ەكٸ بەلدٸ ويىنشىسى – ماركو ۆەرراتتي مەن توما مٶنە كەلەسٸ ويىنعا قاتىسا المايدى.
وسى ويىنمەن قاتار, مادريدتەگٸ «ۆاندا مەتروپوليتانو» ستاديونىندا جەرگٸلٸكتٸ «اتلەتيكو» مەن چەمپيوندار ليگاسىنىڭ قازٸرگٸ جەڭٸمپازى, انگلييانىڭ «ليۆەرپۋل» كومانداسى باق سىناستى. بۇل ويىندا «اتلەتيكو» ٶز ستيلٸندە جەڭٸسكە جەتتٸ. 4-مينۋتتا ساۋل نيگەس ەسەپ اشتى. ارى قاراي, «ٷندٸستەر» يۋرگەن كلوپپ شەكٸرتتەرٸن ٶز قاقپاسىنا جولاتقان جوق. قايتا ٶزدەرٸ اراگٸدٸك قارسى شابۋىلدار جاساپ وتىردى. ويىن تاعدىرىن ەرتە سوعىلعان سول جالعىز گول شەشتٸ.
بٷگٸن جانكٷيەرلەردٸ «اتالانتا» - «ۆالەنسييا», «توتتەنحەم حوتسپۋر» - «رەد بۋلل لەيپتسيگ» ويىندارى كٷتٸپ تۇر.
