Chehiiada 8-9 qazan kúnderi ótken parlament sailaýynda qazirgi premer-ministr Andrei Babishtiń qarsylastary jeńiske jetti.
Daýystar túgel sanalǵan soń birinshi orynǵa "Birgemiz" (SPOLU) koalitsiiasy shyqty. Oǵan oppozitsiiada júrgen úsh ońshyl-tsentristik partiia kirgen. Koalitsiia daýystyń 28 paiyzyn alǵan. Babishtiń qozǵalysy odan sál az daýys alyp, ekinshi orynnan tabyldy.
Úshinshi orynda – solshyl-tsentristik oppozitsiia koalitsiiasy. Parlamentke bulardan bólek Tomio Okamýra bastaǵan ońshyl popýlister de ótip otyr. Kommýnistik partiia bes paiyzdyq mejeden asa almai, alǵash ret parlamentke óte almai qaldy.
Eki oppozitsiialyq koalitsiianyń liderleri jańa úkimetti Babishsiz qurý jóninde kelissóz júrgizetinin málimdep úlgerdi. Eki koalitsiiada úkimetti jasaqtaýǵa jeterlik mandat bar. Premer qyzmetine kelýi múmkin adamdardyń qatarynda Azamattyq demokratiialyq partiianyń lideri Petr Fiala bar.
Chehiia prezidenti Milosh Zeman sailaýdan keiin jeńimpaz partiianyń liderine úkimetti jasaqtaýdy tapsyrýy tiis. Sailaýdyń aldynda ol Babishtiń qozǵalysyn qoldaitynyn jasyrmaǵan.
Teoriia turǵysynan, Zeman úkimet jasaqtaýdy áli de Babishke tapsyra alady. Biraq baiqaýshylardyń boljamynsha, premerdiń koalitsiiadaǵy áriptesteri tarapynan qoldaý tabýy ekitalai.
Iri kásipker Babishtiń premer-ministr qyzmeti daýǵa toly boldy. Onyń sońǵysy sailaýǵa sanaýly kún qalǵanda bastaldy. Oǵan "Pandora qujattary" deitin jýrnalistik zertteý túrtki boldy.
Úkimetti jasaqtaýy múmkin degen oppozitsiialyq partiialar Kreml saiasatyna senimsizdikpen qaraidy. Partiialardyń liderleri Babish úkimetin Reseidegi adam quqyǵyn qorǵaý isinde jáne Chehiia men onyń odaqtastaryn gibridti qaýipterden qorǵaýda birizdi saiasat ustana almady dep aiyptaǵan.
