Chehiia prezidenti Milosh Zeman densaýlyǵyna bailanysty mindetin atqara almai otyr, onyń jumys kabinetine oralýy neǵaibyl.
Mundai aqparat Ortalyq áskeri gospitaldan tarap jatyr. Prezidenttiń ózi bir aptadan astam ýaqyttan beri osy aýrýhananyń jansaqtaý bóliminde jatyr. Bul habardy dúisenbi kúni Chehiia parlamenti joǵarǵy palatasynyń (Senat) tóraǵasy Milosh Vystrchil da aitty. Ol prezident mindetin basqa basshylarǵa berýden basqa amal joq dedi.
Senat tóraǵasy Chehiia konstitýtsiiasyna sáikes, prezident ókilettigin ýaqytsha basqa adamǵa ótkizý máselesi qaralatynyn málimdedi.
Alaida prezident Zemannyń jaqtastary, ol aýrýyna qaramastan qyzmetin atqara alady dep, onyń saiasi qarsylastaryn synap jatyr.
Milosh Zemannyń ózi bir aidan astam ýaqyt kópshilik aldyna shyqpady. Málimetke qaraǵanda, ol parlament sailaýynan keiin-aq aýrýhanaǵa túsken. Sailaýda onyń odaqtasy, premer-ministr Andrei Babish jeńilgen bolatyn. Al jańa premer-ministrdi prezident taǵaiyndaýy kerek.
Prezident ókilettigin ózge adamǵa berý úshin parlament daýys berýi tiis.
Zemannyń diagnozy naqty aitylmaidy. Zańǵa sáikes, ony naýqastyń ózi jariialaýy tiis. Biraq birqatar basylymdar derekkózine silteme jasap, 77 jastaǵy prezidenttiń baýyr entsefalopatiiasymen aýyratynyn habarlady. Bul kesel birden mi qyzmetin isten shyǵaratyn kórinedi.
