Parlamenttiń biylǵy sailaýy – 2021 jyldyń jańa saiasi kezeńiniń qaqpasyn ashyp berdi. Saiasi ǵylymdar kandidaty Andrei Chebotarev osylai dep pikirin bildirdi, dep habarlaidy QazAqparat.
«Byltyrǵy qiyndyqtar halyqqa da, memlekettik bilikke de ońaiǵa túsken joq. Sebebi indet bireýdi bai, bireýdi kedei dep bólmei, kóz aldyndaǵysyn jaipap ótti. Osyndai jaǵdaida ekonomikalyq ahýaldy turaqtandyrý maqsatyna qol jetkizildi. Qoldanystaǵy zańnama aiasynda saiasi reformalar júzege asty. Pandemiiaǵa bailanysty sailaý merzimi ózgeretini, daýys berý onlainǵa ótetini jaily ártúrli alypqashpa áńgime bolǵan edi. Alaida eldiń basshylyǵynyń eńbegin atap ótý kerek. Sebebi sailaý jetkilikti deńgeide uiymdastyrylyp otyr. Jekelegen áreketterge bailanysty pikir talastyrýǵa bolady. Alaida sailaý merziminde ótti, eń bastysy sailaý – 2021 jyldyń jańa saiasi kezeńiniń qaqpasyn ashyp berdi», - dedi Andrei Chebotarev elordada ótken «SAILAU-2021: Parlament sailaýynyń aldyn ala qorytyndylary» atty saraptamalyq talqylaýda.
Saiasattanýshy Prezidenttiń saiasi reformalardyń ekinshi paketin daiyndap jatqanyn eske saldy. Tiisinshe, Parlament Májilisiniń jańa quramy Prezident bildirgen usynystardyń zańnamalyq jumysyn júrgizedi.
«Bul rette Májilistiń jańa quramyna úlken jaýapkershilik artylǵaly otyr. Bes partiialardyń keibiri sailaýda ótpei qalsa da olardyń ókilderi jergilikti máslihattarda bolar degen senimdemiz. Sebebi óńirlerde belgili bir adam ákimdiktiń kómegimen sailanyp jatsa, eshteńe istemei, óz múddesimen júrse – esh nárse ózgermeidi. Esterińizge túsirip kórińizdershi, pandemiianyń shyrqaý sheginde máslihattardyń tipti baryn umytyp kettik. Al qazir máslihattardyń quramynda saiasi partiialardyń ókilderi bolsa, olarǵa degen talap ta kúsheier edi», - dedi ol.
