Foto: businessinsider.com
Prezident Qasym-Jomart Toqaev jasandy intellektiniń damýyna qatysty másele kóterip, Qazaq LLM, Alem LLM jáne ChatGPT júielerin naqty paidalanýshylar sany boiynsha salystyrý qajettigin aitty, dep habarlaidy Ult.kz.
Memleket basshysy Qazaqstanda ázirlengen jasandy intellekt júieleriniń qanshalyqty tanymal ekenin surady. Ásirese, otandyq Qazaq LLM men Alem LLM modelderin sheteldik ónimdermen, sonyń ishinde ChatGPT-pen salystyrǵanda qansha adam qoldanatynyna qyzyǵýshylyq tanytty.
Tsifrlyq damý vitse-premeri ári ministri Jaslan Mádievtiń aitýynsha, elimizde eki iri tildik model jasalǵan.
«Bul modelder 40-tan astam tsifrlyq júiege engizilgen. Olardyń qatarynda eGov AI, Tasbol jáne basqa da servister bar. Modelder ashyq qoljetimdi, olardy IT-kompaniialar, startaptar, stýdentter men ǵylymi-zertteý uiymdary paidalana alady. Degenmen, bul júielerdiń sapasyn únemi jaqsartyp otyrý qajet», – delingen ministrlik habarlamasynda.
Ministrdiń sózinshe, álemdik jetekshi kompaniialar, atap aitqanda OpenAI men Anthropic, óz modelderin turaqty túrde jańartyp otyrady. Sondyqtan Qazaqstan da jasandy intellektini úzdiksiz damytýy tiis. Bul baǵytta halyqaralyq mamandarmen birlesken jumys jalǵasady.
Prezident naqty statistikalyq derekterge de toqtaldy. Ministrliktiń málimetinshe, Qazaq LLM júiesine 600 myńnan astam suranys tirkelgen. Al ChatGPT-ti Qazaqstan halqynyń shamamen 13 paiyzy, iaǵni 2 millionnan astam adam qoldanady.
Sonymen qatar Memleket basshysy qazaqstandyq Aitu messendjeriniń aýditoriiasyna nazar aýdardy. Ministrdiń aitýynsha, Aitu qoldanýshylarynyń sany 700 myńnan asyp, 1 millionǵa jaqyndaǵan. Alaida Prezident bul derekterdiń naqtylyǵyna kúmán keltirip, kórsetkishterdi qaita tekserý qajettigin atap ótti.
