AQSh-tyń aýrýdy baqylaý jáne aldyn alý ortalyǵy (Center for Disease Control and Prevention, CDC) Ortalyq Aziia elderin halyqty jappai koronavirýs testinen ótkizýge shaqyrdy. CDC Ortalyq Aziia boiynsha aimaqtyq direktory Deniel Singer 6 mamyr kúngi telefon brifing kezinde jappai testileý ótkizý arqyly ǵana aýrýdyń qanshalyqty keń taraǵanyn kórýge bolady, sonymen birge indet oshaqtaryn anyqtaýǵa bolady dedi.
Singerdiń aitýynsha, CDC Qazaqstannyń densaýlyq saqtaý salasy men turǵyndardy testileýden ótkizýge 1,68 million dollar qarajat bólgen. Uiymnyń aitýynsha, bul qarajat zerthana jabdyqtary men quraldaryn satyp alýǵa, atap aitqanda PTsR-analiz, densaýlyq saqtaý salasy mamandaryn treningten ótkizý jáne tehnikalyq kómek kórsetýge jumsalmaq.
Deniel Singerdiń sózine qaraǵanda, uiymnyń Ortalyq Aziia aimaǵyna 6,8 mln dollar kóleminde keshendi kómek berý jospary aiasynda Qazaqstanǵa qarjylai kómek kórsetilip otyr.
6 mamyr kúngi málimet boiynsha, Qazaqstanda 4432 adamnan koronavirýs tabylǵan, 30 adam qaitys bolǵan. Álemde virýs juqtyrǵandar 3,7 mln adamǵa jetken. AQSh-ta 1,2 mln adamnan koronavirýs tabylǵan.
