Foto: Akorda.kz
Qasym-Jomart Toqaev Ortalyq Aziia memleketteri basshylarynyń Germaniia Prezidentimen kezdesýine qatysty, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy jiynda «C5 + Germaniia» dialogy týraly bastama elder arasyndaǵy yntymaqtastyqqa tyń serpin beretinin atap ótti.
Qasym-Jomart Toqaev aimaq memleketteri kóshbasshylarynyń birlesken kúsh-jigerin jumyldyrýǵa bolatyn yqpaldastyqtyń basym baǵyttaryn usyndy. Prezident, eń aldymen, saýda-ekonomikalyq qarym-qatynas, jańa kólik-tranzit dálizderin damytý, energetika salasyndaǵy kooperatsiia máselelerine nazar aýdardy.
Kezdesý barysynda klimattyń ózgerýine jáne sý tapshylyǵy problemasyna basa mán berildi. Jiynǵa qatysýshylar muzdyqtardyń erýine jáne Ortalyq Aziiadaǵy ekologiialyq ahýaldyń ózgerýine bailanysty máselelerdi talqylady. Qazaqstan Prezidentiniń pikirinshe, Germaniianyń atalǵan problemalardy sheshýdegi tájiribesi aimaq úshin asa mańyzdy.
Memleketter basshylary Ortalyq Aziia óńiri men Eýropa Odaǵy tóńiregindegi geosaiasi jaǵdaiǵa qatysty máselelerdi de qozǵady. Sonymen qatar Aýǵanstandaǵy qazirgi jaǵdai qarastyryldy.
Germaniia Prezidenti Frank-Valter Shtainmaier Ýkrainadaǵy daǵdarys Eýropanyń, sondai-aq Ortalyq Aziia elderiniń qaýipsizdigine aitarlyqtai áser etedi degen pikir aitty.
Qasym-Jomart Toqaev buǵan jaýap retinde ózara tiimdi beibit sheshimder izdeýge baǵyttalǵan saliqaly diplomatiia qajet ekenin taǵy da málimdedi. Memleket basshysy taraptardyń naqty kelissózderge kirisýi qajet ekenine nazar aýdardy.
Budan bólek, Qazaqstan Prezidenti Ortalyq Aziia elderi men Germaniia arasyndaǵy mádeni-gýmanitarlyq bailanystardy keńeitý qajet ekenine toqtaldy. Atap aitqanda, Memleket basshysy ǵylym jáne bilim salalaryndaǵy birlesken jobalardy, nemis tilin oqytý baǵdarlamalaryn iske asyrýdy qoldady.
Sonymen qatar kezdesýde Qyrǵyzstan Prezidenti Sadyr Japarov, Tájikstan Prezidenti Emomali Rahmon, Ózbekstan Prezidenti Shavkat Mirziioev, Túrikmenstan Halk Maslahatynyń tóraǵasy Gýrbangýly Berdimuhamedov sóz sóiledi.
