Almatyda «Biryńǵai jinaqtaýshy zeinetaqy qory» AQ eks-basshylyǵynyń isi boiynsha aldyn ala sot tyńdalymy ótti, dep habarlaidy QazAqparat tilshisi sot zalynan.
Otyrys barysynda «BJZQ» eks-basshysy Rýslan Erdenaev kinásin moiyndady.
R.Erdenaev pen ózge de tulǵalarǵa menshikke qatysty QR QK 189-babynyń 4 tarmaǵy boiynsha aýyr qylmys jasady dep aiyp taǵylyp otyr.
Erdenaevtyń qorǵaýshysy Aleksandr Blok óziniń qorǵaýyndaǵy azamattyń óz kinásin moiyndap, istegenine ókinip otyrǵanyn aitty.
«Sotqa deiingi tergeý barysynda Rýslan Erdenaev tergeýshilermen birge jumys jasaýǵa ynta bildirdi. Asa aýyr qylmystardyń ashylýyna septigin tigizdi, óz kinásin moiyndady jáne oǵan ókinish bildirdi», - dedi A.Blok.
Aldyn ala sot tyńdalymy barysynda qorǵaýshylar Erdenaevty qamaýdan bosatyp, úi qamaǵyna jiberý týraly ótinish bildirdi.
Eske sala keteiik, Almaly aýdandyq soty 2017 jyldyń 9 qańtarynda «BJZQ» AQ eks-tóraǵasy Rýslan Erdenaevqa, «BJZQ» AQ táýekelderdi basqarý departamentiniń basshysy Musa Bahytovqa, «Alataý Munai Altyn» AQ baqylaý keńesiniń tóraǵasy Baqytjan Kenjebaevqa, «Býzgýl Argým» JShS direktory A.Naizaǵaringe qatysty bultartpaý sharasyn taǵaiyndaǵan bolatyn.
Sotqa deiingi tergeý oryndary R.Erdenaev pen ózge de tulǵalarǵa menshikke qatysty QR QK 189-babynyń 4-tarmaǵy boiynsha aýyr qylmys jasady dep aiyp taǵyp otyr.
Aita keteiik, jyl basynda Ulttyq qaýipsizdik komitetiniń Almaty qalasyndaǵy departamenti BJZQ-nyń quny 5 mlrd teńge bolatyn kelisimshartyn teksergen bolatyn. Ulttyq banktiń qatysýymen «Biryńǵai jinaqtaýshy zeinetaqy qory» AQ-nyń áreketin tekserý ótken jyldyń 21 jeltoqsanynan bastalǵan.
