Parlament Senatynyń jalpy otyrysynda «2021-2023 jyldarǵa arnalǵan respýblikalyq biýdjet týraly» Qazaqstan Respýblikasynyń Zańyna ózgerister men tolyqtyrýlar engizý týraly» Zańy qabyldandy, dep habarlaidy QazAqparat.
«Sizderdiń qaraýlaryńyzǵa 2021 jylǵa arnalǵan respýblikalyq biýdjetti naqtylaý týraly Zań jobasy usynylyp otyr. Naqtylaý «Nur Otan» partiiasynyń sailaýaldy baǵdarlamasyn, Memleket basshysynyń strategiialyq bastamalary men tapsyrmalaryn qarjylyq qamtamasyz etýge, sondai-aq COVID-19 indetimen kúresýge baǵyttalǵan. Atalǵan máselelerdi sheshý úshin 1,3 trln teńge somasynda qosymsha shyǵystar kózdeldi», - dedi QR Qarjy ministri Erulan Jamaýbaev.
Onyń ishinde:
- «Nur Otan» partiiasynyń sailaýaldy baǵdarlamasyn iske asyrýǵa – 884 mlrd tenge;
- koronavirýspen kúres boiynsha epidemiiaǵa qarsy is-sharalardy qarjylandyrýǵa - 265 mlrd teńge;
- Memleket basshysynyń tapsyrmalaryn jáne buryn qabyldanǵan mindettemelerdi oryndaýǵa – 154 mlrd teńge.
«Biýdjetti naqtylaý nátijesinde onyń áleýmettik basymdyǵy saqtalǵan, al naqty sektor men óńirlerdi qoldaý kúsheitildi. Bul týraly biýdjet shyǵystarynyń qurylymy kórsetip otyr. Osylaisha, onyń 723 mlrd teńge somasynda edáýir úlken bóligi ekonomikanyń naqty sektoryn qoldaýǵa baǵyttalǵan. Bul orta merzimde eldiń damýyna oń mýltiplikativtik áser etetin bolady. Nátijesinde, osy salanyń shyǵystary 2,4 trln teńge nemese jalpy shyǵystar kóleminiń shamamen 16 paiyzy mólsherinde josparlanyp otyr.
Biýdjettiń áleýmettik salasy jalpy alǵanda 374 mlrd teńgege ulǵaiyp, 7,5 trln teńgeni nemese jalpy shyǵystardyń 48,7 paiyzyn quraidy», - ministr.
Onyń aitýynsha, kúsh qurylymy shyǵystary 211 mlrd teńgege ósip, 1,6 trln teńge somasynda josparlanǵan.
Jalpy memlekettik shyǵystar 80 mlrd teńgege qysqartylyp, 3,3 trln teńgeni quraidy. Bul shyǵystardyń azaiýy Prezidenttiń bastamalaryna arnalǵan rezervti qaita bólýmen bailanysty.
«Qosymsha shyǵystardyń aitarlyqtai úlesi nysanaly transferttermen óńirlerge beriletinin atap ótý qajet. Olardyń jalpy somasy 539 mlrd teńge bolsa, onyń ishinde damýǵa arnalǵan transfertter – 335 mlrd teńge. Nátijesinde, respýblikalyq biýdjettiń parametrleri kelesidei qalyptasty. Respýblikalyq biýdjet túsimderi 1,1 trln teńgege ulǵaiyp, 12,6 trln teńgeni quraidy. Biýdjet tapshylyǵy jalpy ishki ónimge 3,5% deńgeiinde boljanyp otyr, iaǵni 149 mlrd teńgege ósken. Respýblikalyq biýdjet shyǵystarynyń kólemi 1,3 trln teńgege artyp, 15,3 trln teńgeni quraidy», - dedi E. Jamaýbaev.
