QR Memlekettik qyzmet isteri jáne sybailas jemqorlyqqa qarsy is-qimyl agenttigi oblystyq basqarma basshysyn ustady, dep xabarlaidy "Ult aqparat".
Qoǵammen bailanys departamentiniń direktory Arman Berdalinniń aitýynsha, Mańǵystaý oblysynyń deneshynyqtyrý jáne sport basqarmasynyń basshysy laýazymdy ókilettiligin teris paidalanǵany úshin kúdikke ilindi.
«Sybailas jemqorlyqqa qarsy ulttyq biýro Mańǵystaý oblysynyń deneshynyqtyrý jáne sport basqarmasynyń basshysyna qatysty sotqa deiingi tergeýdi bastady. Ol shetel kompaniiasyn akkreditteý sharasyn zańsyz jeńildetý, sondai-aq, memlekettik-jekemenshik áriptestik kelisimi boiynsha muz saraiynyń qurylysyna is júzinde sáikes kelmeitin jabdyqty jetkizýdi rastaý arqyly laýazymyn teris paidalanǵany úshin kúdikke ilinip otyr. Nátijesinde memleket múddesine 1 milliard teńgeden astam somaǵa zalal keltirilgen. Sot kúdiktige qatysty kúzetpen ustaý túrindegi bultarpaý sharasyn sanktsiialady. Tergeý jalǵasýda», - dedi A.Berdalin Astanada ótken baspasóz máslixatynda.
