© Photo : Pixabay / Steve Buissinne
Naqtylanǵan respýblikalyq biýdjet týraly zańǵa prezident qol qoiǵannan keiin, zeinetaqy men járdemaqy mólsheri qosymsha 4%-ke indeksatsiialanady. Bul týraly eńbek jáne halyqty áleýmettik qorǵaý vitse-ministri Rýslan Sákeev málimdedi, dep habarlaidy Sputnik Qazaqstan.
Onyń aitýynsha, úsh jylǵa naqtylanǵan respýblikalyq biýdjette halyqty áleýmettik qoldaýǵa qosymsha 185 mlrd teńge qarastyrylǵan.
"Bul qarajat zeinetaqy, járdemaqy jáne áleýmettik tólemderdiń mólsherin qosymsha 4%-ke indeksteýge baǵyttalady. Osylaisha 2021 jylmen salystyrǵanda yntymaqty zeinetaqynyń jiyntyq mólsheri 11%-ke, al bazalyq zeinetaqy men basqa da tólemderdiń jiyntyq mólsheri 9%-ke ósedi. Nátijesinde áleýmettik qamsyzdandyrýǵa jáne jumyspen qamtýǵa járdemdesý sharalaryna arnalǵan shyǵystyń jalpy kólemi 4,4 trln teńgeden nemese respýblikalyq biýdjet shyǵysynyń tórtten bir bóliginen (25%) asady", - dedi Sákeev ortalyq kommýnikatsiialar qyzmetinde ótken baspasóz máslihatynda.
Ol biyl zeinetaqy tóleýge 3 trln 64 mlrd teńge qarastyrylǵanyn (naqtylaýdy eskergende) atap ótti. Onyń ishinde respýblikalyq biýdjetten 2 trln 960 mlrd teńge bólinedi. Olar yntymaqty (eńbek) jáne bazalyq zeinetaqyny tóleýge jumsalady. BJZQ-dan jasy boiynsha jinaqtaýshy zeinetaqy tóleý úshin 104 mlrd teńge kózdelgen.
"Jinaqtaýshy zeinetaqyny esepke almaǵanda, zeinetaqynyń (yntymaqty + bazalyq) ortasha mólsheri osy jyldyń 1 sáýirine deiin 105 337 teńge bolsa, 1 sáýirden bastap 109 346 teńgeni quraidy. Al jinaqtaýshy zeinetaqyny qosa eseptesek, zeinetaqynyń (yntymaqty + bazalyq + jinaqtaýshy) ortasha mólsheri 133 337 teńgeden 138 616 teńgege deiin ósedi", - dedi vitse-ministr.
Sákeev jinaqtaýshy zeinetaqy júiesine qatysatyndardyń zeinetaqysy shamamen 30 myń teńgege kóp ekenin atap ótti.
Múgedektigi bar adamdar men asyraýshysynan aiyrylǵan otbasylardy qoldaý
Biyl múgedektigi bar adamdarǵa tólem jasaýǵa 370 mlrd teńge qarastyrylǵan. Onyń ishinde respýblikalyq biýdjetten múgedektigi boiynsha járdemaqyǵa 342 mlrd teńge, Memlekettik áleýmettik saqtandyrý qorynan eńbek etý qabiletinen aiyrylý boiynsha áleýmettik tólemge 28 mlrd teńge bólinedi.
Biýdjetten járdemaqy alatyndar úshin tólemniń ortasha mólsheri: osy jyldyń 1 sáýirine deiin – 52 609 teńge, osy jyldyń 1 sáýirinen bastap – 54 608 teńgeni quraidy. MÁSQ-ten tólenetin tólemderdi eskergende, múgedektigi boiynsha beriletin tólemderdiń jalpy mólsheri 81 210 teńgeden 84 353 teńgege deiin artady.
Asyraýshysynan aiyrylǵan otbasylarǵa tólenetin tólemderge biyl 111 mlrd teńge qarastyrylǵan.
Biýdjetten alatyndar úshin ortasha járdemaqy 43 957 teńgeden 45 627 teńgege deiin ósedi. MÁSQ-ten tólenetin tólemderdi eskergende, asyraýshysynan aiyrylý boiynsha tólemderdiń jalpy mólsheri 73 588 teńgeden 76 443 teńgege deiin kóteriledi.
"Zeinetaqy men járdemaqylardyń joǵary mólsheri maýsym aiynda tólenedi. Onyń ishine sáýir men mamyr ailary úshin qosymsha aqy da kiredi", - dedi Sákeev.
Eńbek ministrliginiń aqparatynsha, búgingi tańda Qazaqstanda 4,2 mln adam ártúrli áleýmettik tólem alady.
Sonyń ishinde: 2,3 mln – zeinetker; 1,2 mln – bala tárbielep otyrǵan otbasylar; 700 myńǵa jýyǵy – múgedektigi bar adamdar; qalǵany basqa sanattar.
Aita keteri, búgin, 5 mamyrda Parlament 2022-2024 jyldarǵa arnalǵan respýblikalyq biýdjet týraly zańǵa ózgerister engizý týraly zańdy qabyldady.
Qujat Memleket basshysy Qasym-Jomart Toqaevtyń qol qoiýyna jiberildi.
