QR Qarjy ministri Erulan Jamaýbaev biýdjet qarajatyn tolyq igermegen ortalyq memlekettik organdardy atady, dep habarlaidy QazAqparat tilshisi.
«Memlekettik biýdjettiń shyǵystary 97,8%-ke, respýblikalyq biýdjettiń shyǵystary – 98,9%-ke, jergilikti biýdjetterdiń shyǵystary – 97,2%-ke atqaryldy. Respýblikalyq biýdjettiń shyǵystary 12 trln 503 mlrd teńgeni qurady jáne 137 mlrd. teńge atqarylmaǵan. Onyń ishinde 15 mlrd teńge únemdelgen, al 122 mlrd teńge igerilmegen», - dedi E. Jamaýbaev Úkimet otyrysynda.
Ásirese Qarjy ministrligi, Ishki ister ministrligi, Ortalyq sailaý komissiiasy, Densaýlyq saqtaý ministrligi, Aýyl sharýashylyǵy ministrligi jáne Tótenshe jaǵdailar ministrligi aitarlyqtai iri somalardy igermegen.
«Igerilmeýdiń negizgi sebepteri: konkýrstyq rásimderdi, sharttardy jasasý rásimderiniń uzaqqa sozylýy, tólem qujattaryn uzaq maquldaý, atqarylǵan jumystardyń aktilerin usynbaý, naqty kórsetilgen qyzmet, atqarylǵan jumystarǵa aqy tóleý jáne sot talqylaýlary. Qarjy jylynyń sońyna deiin respýblikalyq biýdjet boiynsha 1 trln teńgeden astam somaǵa tólemder júrgizilýi tiis. Aldyn ala derekter boiynsha jyl qorytyndysynda respýblikalyq biýdjet shyǵystarynyń atqarylýy 99,8% sheginde kútilýde. Sonymen birge, jekelegen biýdjettik baǵdarlamalar boiynsha igerilmeý táýekeli bar», - dedi Qarjy ministri.
