Qandastarymyzdyń elge kelýi jáne jáne azamattyq alý rásimderiniń ońailatylýyna bailanysty, ótken jyly, elimizge 16 myńnan astam oralmandar otbasy kóship keldi, dep habarlaidy QazAqparat Eńbek jáne halyqty áleýmettik qorǵaý ministrliginiń baspasóz qyzmetine silteme jasai otyryp.
Atalmysh kórsetkish 2015 jyly Otanyna oralǵandarǵa qaraǵanda 8 esege artyq. Degenmen, kelgen qandastarymyzdyń basym bóligi turǵylyqty jeri retinde Astana men Almaty qalalaryn jáne ońtústik óńirlerdi tańdaǵandyqtan, bul rette soltústik óńirlerge qonystanýdyń teris saldosy ulǵaidy.
Jalpy, Eńbek jáne halyqty áleýmettik qorǵaý ministri Tamara Dúisenovanyń aitýynsha, 1991 jyldan 2017 jyldyń 1 sáýirine deiin 1 millionnan astam etnikalyq qazaq tarihi atamekenine oralyp, oralman mártebesin aldy. 2016 jyly - 16,4 myń otbasy (33 754 adam), 2017 jyldyń 1 toqsanynda - 2,6 myń otbasy (4,9 myń adam).
«Osy oraida 2016 jyly elimizge qonys aýdarǵan tulǵalardyń eńbekke jaramdy úlesi 56 paiyzdy qurasa, 18 jasqa deiingi balalar - 39% jáne zeinetkerler - 47% boldy. 2017 jyly elge oralǵandardyń 26,4%-yn 18 jasqa deiingi balalar, 67,3%-yn eńbekke jaramdy jandar, 6,3%-yn zeinetkerler ielendi», - dep atap ótti ministr.
Kósh bet túzegen negizgi elderdiń ishinde byltyr jáne biyl Ózbekstan (tiisinshe 2016 jyly 62% jáne 2017 jyly 54,5%), Qytai ( 2016 jyly 14% jáne 2017 jyly 33,4%), Mońǵoliia (2016 jyly 9% jáne 2017 jyly 2,1%), Túrkimenstan ( 2016 jyly 6,7% jáne 2017 jyly 4,6%) memleketteri erekshe kózge túsedi.
2016 jyly, qonys aýdarýshylardy qabyldaýda 7 óńir (Aqmola, Atyraý, Shyǵys Qazaqstan, Batys Qazaqstan, Qostanai, Pavlodar jáne Soltústik Qazaqstan oblystary) jáne kóshtiń qainar kózi retinde 4 óńir (Almaty, Jambyl, Mańǵystaý jáne Ońtústik Qazaqstan oblystary) belgilengen. Joǵaryda keltirilgen óńirlerge qonys aýdarýdy uiǵarǵan otandastarymyzǵa kósh shyǵyndaryn jabatyn jáne bir jyl boiy baspana jaldaýǵa qajet qarjyny óteitin qarjy bólinedi. 2017 jyly 2,7 myń azamattyń qonys aýdarýyna sýbsidiia tóleý kózdelgen.
Biylǵy 3-5 sáýir aralyǵy Ońtústik Qazaqstan oblysynyń eki aýdany men Shymkent qalasynda bos jumys oryndary jármeńkesi ótip, onda Qostanai, Pavlodar, Soltústik Qazaqstan jáne Shyǵys Qazaqstan oblystarynyń 636 jumys berýshisi óndiris, bilim berý, densaýlyq saqtaý, memlekettik basqarý, aýylsharýashylyq, qurylys salalarynan 1785 jumys ornyn usyndy. Jármeńke qorytyndysynda 672 otbasy elimizdiń teriskei aimaqtaryna qonys aýdarýǵa sheshim qabyldady. Osymen birge eńbek resýrstaryna suranysty qanaǵattandyrý men eńbek naryǵynyń mobildiligin arttyrý máseleleri boiynsha Ońtústik Qazaqstan oblysy men Qostanai, Pavlodar, Shyǵys Qazaqstan oblystary ákimdikteri arasynda yntymaqtastyq memorandýmyna qol qoiyldy.
Ústimizdegi jyly Ministrlik tarapynan 2017-2021 jyldarǵa arnalǵan Kóshi-qon saiasaty tujyrymdamasyn jasaý qolǵa alynyp, onda kóshi-qon úderisin tiimdi túrde retteý, ornyqty demografiialyq órkendeý men eldegi bilikti jumys kúshine suranysty qamtamasyz etý, ulttyq qaýipsizdikti nyǵaitý máseleleri kórinis tabatyn bolady.
