Eńbek qyzmetine bailanysty jazataiym oqiǵa kezinde zardap shekkender sany ótken jyly 2 133 adamdy qurady, onyń ishinde 389 adam (18,2%) – áielder, dep habarlaidy QazAqparat.
Ulttyq statistika biýrosynyń málimetinshe, zardap shekkenderdiń jalpy sanynan qaza tapqandar sany 176 adamdy qurady, bul 2020 jylǵa qaraǵanda 27 adamǵa kem.
Jaraqattanýdyń eń joǵary kórsetkishi Qaraǵandy oblysynda saqtalyp otyr. 2021 jyly onda 537 jaǵdai tirkeldi, bul jalpy jaǵdailardyń 25,2% quraidy.
Ekinshi orynda Shyǵys Qazaqstan oblysy, onda óndiriste 320 adam jaraqat aldy (jalpy sanynyń 15%).
Toptyq jazataiym oqiǵalarda 240 adam, kásibi aýrý saldarynan – 351 adam, 47 adam ýlanýdan zardap shekti.
Sondai-aq mas kúiinde 24 adam, esirtki áserinde bolǵan 8 adam qyzmette jaraqat alǵan. Psihikalyq aýytqý saldarynan óndiriste 9 adam zardap shekken.
Óńdeý ónerkásibi jaraqat alý qaýpi joǵary sala bolyp otyr, ótken jylǵy jazataiym oqiǵalardyń 26,8% osy salada tirkeldi.
Ekinshi orynda taý-ken óndirý ónerkásibi, onda zardap shekkenderdiń 20,8%-y jumys istegen. Jazataiym oqiǵalar sany eń az sala – aýyl, orman jáne balyq sharýashylyǵy, jaraqat alǵandardyń úlesi – 2,9%-y.
Zardap shekkenderdiń aýyr dárejede jaraqat alǵandar úlesi – 44,6%, ortasha dárejede – 13%, jeńil dárejede 32,5% qurady. Zardap shekkenderdiń 9,9% qaitys boldy.
Ótken jyly eń kóp taralǵan kásibi aýrýlar: dorsalgiia – spetsifikalyq emes arqadaǵy aýyrsyný (200 adam); radikýlopatiia – nevrologiialyq sindrom (196 adam) jáne dirildiń jáne basqa da syrtqy sebepterdiń áseri (146 adam).
