Foto: ashyq derekkóz
2025 jyly 119-dan astam kitap 240 500 dana taralymmen basylyp, elimizdiń óńirlik kitaphanalaryna jetkizildi. Bul – ulttyq ádebietti qoldaý men oqyrman qoryn baiytý baǵytyndaǵy júieli jumystyń nátijesi.
Jańa basylymdar qatarynda «Shoqan. Erek týǵan fenomen» fotoalbomi, Abai Qunanbaiulynyń 180 jyldyǵyna arnalǵan eńbekter, Baqytsyz Jamal romany, sondai-aq Iliias Esenberlin, Jumeken Nájimedenov, Qadyr Myrza Áli jáne Tumanbai Moldaǵaliev shyǵarmalar jinaqtary bar.
Halyqaralyq yntymaqtastyq aiasynda Italiia tarapynyń qoldaýymen Shoqan Ýálihanov týraly kitaptyń italian jáne aǵylshyn tilderindegi nusqalarynyń tanystyrylymy Rim qalasynda ótti. Sondai-aq QR Mádeniet jáne aqparat ministrligi Frankfurt Book Fair aiasynda ulttyq pavilon uiymdastyryp, mereitoilyq basylymdardy kópshilik nazaryna usyndy. Olardyń qatarynda jeti tilge aýdarylǵan «Abaidyń qara sózderi. Urpaqqa Ulaǵat» eńbegi de bar. Al «Baqytsyz Jamal» romany ulttyq prozanyń alǵashqy týyndylarynyń biri retinde halyqaralyq deńgeide joǵary baǵaǵa ie boldy.
QR Mádeniet jáne aqparat ministrligi men Qazaqstan Jazýshylar odaǵy arasyndaǵy strategiialyq seriktestik aiasynda jas avtorlar býynyn qalyptastyrýǵa baǵyttalǵan úsh iri joba júzege asqany belgili. Joba nátijesinde 35 kórkem jáne ǵylymi-tanymdyq jinaq jaryq kórip, elimizdiń kitaphanalaryna jóneltildi.
Aita keteiik, ulttyq ádebietti qoldaý, kitap qoryn tolyqtyrý jáne jas qalamgerlerge jol ashý – rýhani damýdyń mańyzdy tetigi bolyp qala beredi.
