Sońǵy 5 jylda Aqtóbe oblysynyń densaýlyq saqtaý salasyna 200 milliard teńgege jýyq qarjy bólindi. Oblystyń emdeý mekemeleri halyqaralyq standarttarǵa sai keletin apparattarmen jabdyqtaldy. Olardy jetik meńgergen bilikti mamandar bolýy qajet. Sondyqtan dárigerlerdi Ońtústik Koreia, Germaniia, Izrail, Resei elderine taǵylymdamadan ótýge jiberip jatyrmyz dedi Aqtóbe oblysynyń ákimi Berdibek Saparbaev. Ol bul jóninde Batys Qazaqstan memlekettik meditsina ýniversitetinde ótken halyqaralyq meditsinalyq forýmda baiandady.
Oblysta da transplantatsiialyq operatsiialar jasala bastady
Jiynǵa oblys ákimi Berdibek Saparbaev, Densaýlyq saqtaý jáne áleýmettik damý ministrliginiń jaýapty hatshysy Aida Qurmanǵalieva, sondai-aq, Belarýs, Izrail, Resei, Túrkiia, Ońtústik Koreia elderi jetekshi emhanalarynyń, respýblikalyq ǵylymi meditsinalyq ortalyqtardyń basshylary, meditsinalyq klasterge kiretin Atyraý, Mańǵystaý, Batys Qazaqstan, Qyzylorda oblystarynyń ókilderi qatysqan bolatyn.
“Jyl saiyn bizge kórshi oblystardan 8 myńnan astam turǵyn kelip, emdeledi. Bizdiń óńir respýblikalyq ǵylymi ortalyqtarmen jáne halyqaralyq deńgeidegi emhanalarmen yntymaqtastyqta jumys isteýde. Qazir elimizdegi siiaqty, oblysta da baýyr, búirek aýystyrylady”, Berdibek Saparbaev.
Forýmǵa qatysýshylar aldymen arnaiy ázirlengen kórmeni aralap kórdi. Kórmege sońǵy úlgidegi meditsinalyq jabdyqtar, hirýrgiia men travmatologiiadaǵy zamanaýi quraldar, tipti jergilikti farmatsevtikalyq zaýyttyń fitoónimderi qoiyldy. Munda shetelden jáne kórshi oblystardan kelgen kompaniialar da óz ónimderin usyndy.
Oblystyq densaýlyq saqtaý basqarmasynyń basshysy Áset Qalievtyń aitýynsha sońǵy bes jylda ǵana 63 densaýlyq saqtaý nysany paidalanýǵa berilgen. Oblystaǵy aýrýhanalar men emhanalarda 8 kompiýterlik jáne 6 magnittik-rezonanstyq tomografiia, 109 ÝZI apparaty bar. Meditsinalyq klasterdiń qurylýy aiasynda oblystaǵy jetekshi emhanalardy biriktiretin «Aktobe medical center» aýrýhanasyn qurý josparlanyp otyr. Sondai-aq, meditsinalyq klasterdiń quramyna Aqtóbe qalalyq balalar aýrýhanasy, meditsinalyq jedel járdem aýrýhanasy, «Darý» emhanasy, oblystyq perinataldyq ortalyq, M.Ospanov atyndaǵy Batys Qazaqstan memlekettik meditsina ýniversiteti kiredi.
Qazirgi tańda Aqtóbede memlekettik-jekemenshik áriptestik aiasynda «Alǵashqy járdem» JShS quny 2,4 mlrd teńge bolatyn Aqtóbe qalalyq jedel járdem stansasynyń qurylysyn bastady. Sonymen qatar, memlekettik-jekemenshik áriptestik jáne klaster negizinde basqa nysandar salý josparlanýda.
Jańa tseh iske qosyldy
Ońtústik Koreianyń «Sincheon Severens» gospitaliniń bas direktory Li Ben Sok “Elge barǵan boida aqtóbelik dárigerlerdi Ońtústik Koreiada oqytyp, sheberlikterin jetildirýdiń jáne aimaqpen jańa ǵylymi-zertteýler júrgizýdiń baǵdarlamasyn jasaimyz. Biz budan tórt jyl buryn bilikti dárigerlerimizdi Qazaqstanǵa ota jasaýǵa jibere bastadyq. Ondai ota Aqtóbede de jasaldy. Bul dástúrdi biyl da jalǵastyramyz”, dedi.
Túrik kompaniiasynyń ókili, doktor Abdrahman Kavýndjý memleketaralyq-jekemenshiktik áriptestik jaiynda baiandady. Ol ózderi salyp jatqan jedel járdem stansasynyń artyqshylyǵyn aitty. Onyń málimdeýinshe, biyl Call ortalyǵy, garaj paidalanýǵa beriledi eken.
Forým barysynda oblys ortalyǵyndaǵy «TK Farm Aqtóbe» farmatsevtikalyq kompaniiasy qatty tabletka túrindegi dárilik zattardy óndirý tsehyn iske qosyldy. Buǵan deiin bul kompaniia jergilikti shópterden jasalǵan sirop jáne kapsýla túrindegi dárilik ónimderdi shyǵaryp kelgen-di. 2012 jyly iske qosylǵan kompaniiada dárilik zattardyń 14 túri shyǵarylady.
Budan keiin forýmǵa qatysýshylar «Nur Aqtóbe» shaǵyn aýdanynda ashylǵan 1200 oryndyq jańa mekteptegi «Densaýlyq-ekspress» baǵdarlamalyq-apparat kesheni jumysymen tanysty. Bul Qazaqstan boiynsha alǵash ret osy mektepte iske qosylǵan zamanaýi qondyrǵy. Osy qondyrǵy arqyly oqýshyny emhanaǵa aparmai-aq, tolyq skriningtik tekserýden ótkizýge bolady.
Satybaldy SÁÝIRBAI,
«Egemen Qazaqstan»
AQTÓBE
.jpeg)