Qazaqstan Premer-Ministriniń orynbasary – Syrtqy ister ministri Muhtar Tileýberdi Jenevaǵa sapary barysynda BUU Adam quqyqtary jónindegi Joǵarǵy komissary Mishel Bacheletpen kezdesti. Bul týraly vedomstvonyń baspasóz qyzmeti habarlady.
Kezdesý barysynda taraptar 2022-2024 jyldary AQK-ǵa qazaqstandyq músheliktiń basymdyqtaryn jáne BUU Adam quqyqtary jónindegi Joǵarǵy komissary basqarmasy (AQJKB) delegatsiiasynyń Qazaqstanǵa saparynyń qorytyndylaryn talqylady. Onyń nátijeleri Prezident Qasym-Jomart Toqaevtyń adam quqyqtaryn qorǵaý, demokratiialyq qoǵam qurý jáne «Halyq únine qulaq asatyn memleket» tujyrymdamasyn engizý bóliginde bastamashylyq etken saiasi reformalardy iske asyrýda tehnikalyq kómek kórsetý úshin basym baǵyttardy aiqyndaýǵa múmkindik beredi.
Muhtar Tileýberdi Qazaqstandaǵy qańtar aiyndaǵy oqiǵalardy tergeý barysy týraly, sondai-aq adam quqyqtary salasyndaǵy óziniń halyqaralyq mindettemelerin oryndaýdy qamtamasyz etý jónindegi memlekettiń keshendi sharalary týraly Joǵarǵy komissardy habardar etti. Ol Qazaqstan biligi ádil tergeý júrgizip jatqanyn, onyń nátijeleri álemdik qoǵamdastyqqa usynylatynyn atap ótti.
Sondai-aq Qazaqstan SIM basshysy suhbattasyna Prezident Q.Toqaev 16 naýryzda qazaqstandyq qoǵamdy saiasi transformatsiialaýǵa baǵyttalǵan reformalardyń jańa baǵdarlamasyn jariialaýdy josparlap otyrǵanyn habarlady. Sonymen qatar, Ministr M.Bacheletti Qazaqstanǵa saparymen kelýi týraly Memleket basshysynyń shaqyrýyn eske saldy.
Óz kezeginde Joǵarǵy komissar Qazaqstan Úkimeti júrgizip jatqan jumysty joǵary baǵalady, sondai-aq ulttyq quqyq qorǵaý institýttarynyń quqyq qorǵaý reformalaryn iske asyrýǵa qatysýynyń mańyzdylyǵyn atap ótti.
M.Bachelet onyń keńsesiniń Qazaqstanǵa qajetti tehnikalyq kómek kórsetýge daiyndyǵyn bildirdi. Qazaqstannyń azamattardyń áleýmettik-ekonomikalyq máselelerin sheshý jónindegi sharalaryna qoshemet kórsetti.
