"Taliban" qozǵalysy bilikke kelgennen keiingi saiasi daǵdarys saldarynan Aýǵanstan halqynyń jartysyna jýyǵyna ashtyq qaýpi tónip tur. Bul týraly Reuters agenttigine aitqan BUU azyq-túlik baǵdarlamasynyń direktory Devid Bizli "14 mln adam" dep naqty tsifrdy atady, dep jazady Azattyq.
Bizlidiń sózine qaraǵanda, birneshe jyl qatarynan bolǵan qýańshylyq, konflikt pen koronavirýs indeti jáne ekonomikadaǵy daǵdarystan keiin Aýǵanstandy "aýyr apat" kútip tur. Gýmanitarlyq apattyń aldyn alý úshin Birikken ulttar uiymyna qyrkúiekke qarai kemi 200 million dollar kerek. Oǵan deiin halyqtyń azyq-túligi taýsylyp, gýmanitarlyq kómekke muqtaj aýǵandar eki ese kóbeiedi.
BUU Aýǵanstanǵa qajetti kómekti AQSh, Katar jáne Parsy shyǵanaǵy elderi bóle me dep úmittenedi. Tálipter BUU kómegi muqtaj adamdardyń qolyna jetetinine kepildik berip otyr deidi Bizli.
Sarapshylardyń baǵalaýynsha, Aýǵanstanda 36 million adam ómir súredi.
2020 jyldyń qarashasynda shetel tórt jyl ishinde Aýǵanstanǵa 12 milliard dollar gýmanitarlyq kómek berýdi uiǵarǵan edi. Biraq kóp memleket bul kómektiń Aýǵanstan biligi adam quqyǵyn qalai qorǵaǵanyna qarai beretinin alǵa tartqan.
BUU tálipter bilikke kelgen soń adam quqyǵyn buzyp jatqanyn senimdi derekkózderden bilip otyrǵanyn habarlaǵan. Bul habarǵa qaraǵanda, Aýǵanstannyń burynǵy biliginiń qaýipsizdik kúshterinde qyzmet etkender men qarapaiym aýǵan azamattarynyń óltirilgeni jaily málimetter bar. "Taliban" mundai qatygezdik týraly kez-kelgen habardy zerttep, kinálini jaýapqa tartatynyn málimdegen.
Shariǵat zańyn ustanatyn "Taliban" qozǵalysy 15 tamyzda Kabýldy alǵan soń Aýǵanstanǵa tolyq baqylaý ornatqanyn jariialaǵan. Sonan beri áielder men qyzdarǵa kóbirek quqyq beretinine, zorlyq-zombylyq kórsetpeitinine, sóz erkindigine de airyqsha tyiym salmaitynyna halyqaralyq qaýymdystyqty sendirýge tyrysyp keledi.
