Resei áskeri injenerleri Aleppo mańyndaǵy aýdanda minadan tazartý jumystaryn júrgizip jatyr. Siriia, qańtar 2017 jyl.
BUU sarapshylary Irak pen Siriiadaǵy kóp jyldyq soǵysta jasyrylǵan minalar, qoldan jasalǵan jarylǵysh zattar men jarylmaǵan basqa da oq-dárilerdi tazalap, zalalsyzdandyrýǵa 40-50 jyl ýaqyt pen milliardtaǵan dollar qarjy ketetinin málimdedi.
BUU-nyń minidan tazartý qyzmetiniń direktory Agnes Markailýdyń aitýynsha, soǵys sharpyǵan eki eldi Ekinshi dúniejúzilik soǵystan keiingi Eýropa siiaqty jasaý úshin ondaǵan jyl ýaqyt qajet. Bul týraly ol 4 sáýirde Halyqaralyq mina qaýpinen habardar etý kúnine orai ótken baspasóz konferentsiiasynda aitty.
Markailý Iraktaǵy "Islam memleketi" ekstremistik uiymynan qaitaryp alynǵan territoriialardy mina, qarý-jaraq pen jarylǵysh zattardan tazartý úshin jylyna 180 million dollar, onyń ishinde tek Mosýl qalasynyń ózinde osyndai jumystar júrgizýge jylyna 50 million dollar jumsaý kerek degen boljam jasady.
"Ekinshi dúniejúzilik soǵystan keiin frantsýzdar, nemister men britandyqtardyń óz jerin ózi tazalaǵany siiaqty Irak úkimetine de óz problemasymen óziniń ainalysýyna múmkindik berý qajet" dedi Markailý. Ol sonymen qatar Siriia territoriiasyn qaitadan qaýipsiz etý úshin "orasan zor kúsh qajetin", biraq onyń qarjy tabylǵanda ǵana júzege asatynyn aitty.
