Sońǵy 20 jylda ásker jáne úkimettik emes qarýly kúshterden 170 myńnan astam bala bosatyldy, dep habarlaidy QazAqparat BUU-nyń Jańalyqtar saityna silteme jasap.
Mundai nátijege Balalardyń janjaldarǵa qatysýyna bailanysty Balanyń quqyqtary týraly konventsiianyń fakýltativtik hattamasynyń kómegi zor boldy. Alaida áli kúnge deiin kámelettik jasqa tolmaǵandar men jas balalar áskerge alynyp, barlaýshy jáne seksýaldy qul retinde paidalanylyp keledi.
«172 memleket ratifikatsiialaǵan fakýltativtik hattama – soǵysta balalarǵa oryn joqtyǵy týraly jahandyq bátýalastyq. Bul elder 18 jasqa tolmaǵandardy áskeri áreketterge qatystyrmaýǵa ýáde bergen», - delingen Bas hatshynyń Balalar jáne qarýly qaqtyǵys jónindegi arnaiy ókili men Adam quqyqtary jónindegi komitet músheleriniń baiandamasynda.
Alaida balalar áli kúnge deiin soǵysqa qatysyp keledi. 2005 jyldan bastap balalar quqyqtarynyń buzylý faktileriniń úshten biri olardyń áskerge áketilýi men seksýaldy qul, jansyz jáne úi qyzmetshisi retinde paidalanylýy bolyp otyr. 2005 jyldan bastan soǵys áreketterine 93 myń bala qatysqan.
«Búgin Fakýltativtik hattamanyń kúshine engenine 20 jyl tolyp otyr. Soǵan bailanysty osy qujatty qabyldamaǵan elderdi ony bekitýge, balalardy qarýly kúshterge tartýdy toqtatýǵa shaqyramyz. Sonymen qatar atalǵan áreketter úshin qylmystyq jaýapkershilik engizýdi usynamyz», - delingen hattamada. Onyń avtorlary hattamany bekitken elderdi ondaǵy mindetterdi oryndaýǵa shaqyrdy.
