Jyl saiyn mamyrdyń 3-ine atalatyn dúniejúzilik sóz bostandyǵy kúni koronavirýs pandemiiasy jaily aqparattardy shekteitin elderde jýrnalisterdi qorqytyp-úrkitýmen ótip jatyr.
Bul pikirdi AQSh memlekettik hatshysy Maik Pompeo túrmedegi jýrnalisterdi bosatyp, tsenzýrany dereý toqtatýǵa shaqyrǵan sózinde aitty. Alaida ol qai memleketterdi meńzegenin naqty atamady.
"Pandemiia kezinde kásibi jýrnalister men ózge de jazýshy adamdarǵa oi-pikirin ashyq aitýǵa, kórgeni men estigenin erkin jazýǵa múmkindik berý kerek, – dedi Pompeo. Onyń sózinshe, táýelsiz mediany qorǵaý ornyna kei úkimetter ádeii jalǵan aqparat taratyp, naqty jáne paidaly aqparattardy tsenzýraǵa usharatady, jýrnalisterdiń qoǵam igiligine paidaly jumysyn meilinshe shekteidi.
Buǵan deiin Maik Pompeo AQSh Qytaida koronavirýs indeti jaily aqparattardyń qalai shektelgenin biletinin aitqan edi. "Pekin jańa koronavirýs qalai tarala bastaǵanyn jasyryp, jabýǵa tyrysyp otyr dep" sózin túiindegen ol naýryz aiynda Qytai biligi AQSh-tyń birneshe jýrnalisin shyǵaryp jibergenin de eske saldy.
Amnesty International baspasóz bostandyǵy kúni qarsańynda Egipettegi BAQ ahýaly týraly baiandama jariialady. Quqyq qorǵaýshylar Egipet biligi sońǵy tórt jylda jýrnalistikany "qylmysqa" ainaldyrdy dep sanaidy. Munyń áseri COVID-19 daǵdarysy kezinde de bilingen.
Birikken ulttar uiymynyń bas hatshysy Antoniý Gýterresh koronavirýs pandemiiasy kezinde tekserilmegen, kúmándi málimetterdiń kóbeigenine nazar aýdarǵan. "Mundaiǵa faktiler men ǵylymi taldaýlarǵa súiengen aqparat taratyn baspasóz qarsy tura alady" dedi ol.
