Qazaqstannyń BUU Qaýipsizdik Keńesindegi tóraǵalyǵy jumysynyń alǵashqy kúni Qaýipsizdik Keńestiń qańtar aiyndaǵy qyzmetiniń baǵdarlamasy usynyldy. Qazaqstannyń BUU janyndaǵy Turaqty ókildiginde ótken QK múshe elderi turaqty ókilderiniń qyzmet babyndaǵy tańǵy asynda jumys josparynyń basty tarmaqtary talqylandy, dep habarlaidy "Ult aqparat" SIM baspasóz qyzmetine silteme jasap.
Diplomattar qazaqstandyq tóraǵalyq baǵdarlamasynyń sapaly daiyndalǵanyna nazar aýdardy. Atap aitqanda, Reseidiń Turaqty ókili Vasilii Nebenzia «Keńes músheleriniń ishinen Qazaqstandy eń jaqsy tanityn» reseilik tarap, tarihi faktor men dástúrli qazaqstandyq-reseilik ózara tyǵyz qatynastardy eskere otyryp, qazaqstandyq delegatsiianyń Keńes Tóraǵasy retindegi jumysynyń sáttiligine senimdi ekenin bildirdi. Reseilik diplomat 18 qańtarda Qazaqstan Prezidenti Nursultan Nazarbaevtyń qatysýymen ótetin BUU QK-niń «Jappai qyryp-joiý qarýyn taratpaý: senim sharalary» taqyrybyndaǵy joǵary deńgeili brifingine Resei Syrtqy ister ministri Sergei Lavrov qatysatynyn habarlady. AQSh Turaqty ókili Niki Heili men Keńeske múshe basqa elderdiń elshileri senim sharalary arqyly taratpaýdyń ózekti máselelerin jáne Keńes qyzmetiniń kún tártibinde Ortalyq Aziia men Aýǵanstan boiynsha ministrler deńgeiindegi pikirtalasty qamtityn Qazaqstannyń qańtardaǵy baǵdarlamasynyń mazmundylyǵy men qanyqtyrylǵandyǵyn atap ótti.
Sol kúni Qazaqstan bastamasymen BUU tarihynda tuńǵysh ret BUU Qaýipsizdik Keńesine jańadan sailanǵan turaqty emes alty músheleri - Kot d’Ivýardyń, Ekvatoriialyq Gvineianyń, Kýveittiń, Niderlandtyń, Perý men Polshanyń týlaryn kóterý saltanatty rásimi ótti. Is-sharaǵa Perýdiń Syrtqy ister ministri Rikardo Lýna qatysty. Bul rásim BUU men QK múshe-elderiniń, álemdik BAQ, BUU qurylymdarynyń jáne memlekettik emes uiymdardyń ókilderiniń anaǵurlym sanyn jinady. Kóptegen delegatsiialardyń pikirinshe, osy is-shara BUU-nyń jańa dástúriniń basy retinde qalyptasyp, qazaqstandyq tóraǵalyqtyń bastalýynyń jarqyn «vizit kartasy» retinde qabyldandy. Bul qadamnyń jańashyldyǵymen qatar, beibitshilik pen qaýipsizdiktiń halyqaralyq problemalaryn sheshý boiynsha dúniejúzilik qaýymdastyq aldyndaǵy Keńestiń jańa músheleriniń joǵary jaýapkershiligin ereksheleitin onyń tereń simvolizmi atalyp ótti. Bastama BUU Qaýipsizdik Keńesindegi qazaqstandyq tóraǵalyq murasynyń elementi retinde qarastyrylýda. Máselen, Ekvatoriialyq Gvineia turaqty ókiliniń málimdeýinshe, onyń delegatsiiasy osy dástúrdi bekitip, kelesi jyldyń qańtarynda óziniń tóraǵalyǵy barysynda osy rásimdi qaitalaityn bolady.
Keńestiń qańtardaǵy baǵdarlamasy resmi túrde QK músheleriniń otyrysynda bekitildi, odan keiin ol Qazaqstannyń Turaqty ókili Qairat Omarovtyń jeke brifingi sheńberinde BUU múshe elderiniń nazaryna usynyldy. Kezdesýge qatysqan delegatsiialar Qazaqstandy QK tóraǵasy laýazymyna ornalasýymen quttyqtap, aldaǵy jumysta tabys tiledi. Birqatar memleketter, onyń ishinde Marokko, Chili, Kolýmbiia men Tájikstan qazaqstandyq tarap óz tóraǵalyǵy sheńberinde ótkizýge kózdegen jappai qyryp-joiý qarýyn taratpaý jáne qaýipsizdik pen damýdyń ózara táýeldiliginiń úlgisi retindegi Aýǵanstan men Ortalyq Aziiadaǵy óńirlik áriptestikti qurý máseleleri boiynsha is-sharalardyń ózektiligin atap ótti. Omarov múshe elderdiń Qazaqstan tóraǵalyǵynyń jumys baǵdarlamasy boiynsha kóptegen suraǵyna jaýap berdi.
Tóraǵalyq etýshi eldiń turaqty ókili Omarov dástúrli baspasóz konferentsiiasy barysynda BUU janynda akkredittelgen tilshilerdi qazaqstandyq tóraǵalyqtyń basymdyqtarymen jáne de Keńestiń qańtar aiyndaǵy jumys baǵdarlamasymen tanystyrdy. Memleket basshysy Nazarbaevtyń qatysýymen ótkiziletin senim sharalary arqyly taratpaý salasyndaǵy joǵary deńgeidegi is-sharalar, solardyń ishinde Soltústik Koreiadaǵy, Irandaǵy, Palestinadaǵy ahýal boiynsha jáne de Ierýsalim mártebesi, Mianmadaǵy jaǵdai álemdik buqaralyq aqparat quraldary ókilderiniń qyzyǵýshylyǵyn týdyrdy. Siriiaǵa, Iemendegi gýmanitarlyq ahýalǵa, klimattyń ózgerýine, Qazaqstannyń «jasyl tehnologiialar» salasyndaǵy bastamalary men jasampazdyǵyna qatysty suraqtar qoiyldy. Álemniń Al-Arabiya, The Huffington Post, The Associated Press, Agence France Presse, CBS, FOX News, Nikkei, Mainichi, Fiji TV, Tokyo Shimbun, NHK jáne basqalary tárizdi jetekshi BAQ-tarynyń tilshilerine jahandyq kún tártibindegi basty máseleler boiynsha Elbasynyń bastamalary aiasyndaǵy Qazaqstannyń ustanymy boiynsha naqty jaýaptar berildi.
Jalpy Qazaqstannyń BUU Qaýipsizdik Keńesindegi tóraǵalyǵynyń birinshi jumys kúni jemisti ótip, elimizdiń jáne Prezidenti Nazarbaevtyń halyqaralyq joǵarǵy bedelin jáne qurmetin taǵy da aiǵaq etti.
