Shveitsariianyń Jenevasyndaǵy BUU-nyń áielderge qatysty kemsitýshilikterdi joiý jónindegi komitetinde (Komitet) Áielderge qatysty kemsitýshiliktiń barlyq nysandaryn joiý jónindegi konventsiianyń Qazaqstan Respýblikasymen oryndaýy týraly baiandamany qorǵaý ótti, dep habarlaidy "Ult aqparat".
Qazaqstandyq delegatsiia quramyna Prezident janyndaǵy Áielder isteri jáne otbasylyq-demografiialyq saiasat jónindegi ulttyq komissiia, Joǵarǵy Sot, Bas prokýratýra, Memlekettik qyzmet isteri jónindegi agenttigi, Ishki ister, Eńbek jáne halyqty áleýmettik qorǵaý, Densaýlyq saqtaý, Bilim jáne ǵylym, Syrtqy ister, Aqparat jáne qoǵamdyq damý ministrlikteriniń, ÚEU ókilderi, sonymen qatar Adam quqyqtary jónindegi ýákil endi.
Qorǵaý barysynda delegatsiia basshysy, Ulttyq komissiia tóraiymy G.Ábdiqalyqova BUU sarapshylarynyń nazaryna Áielderdiń qoǵamdyq-saiasi, ekonomikalyq jáne áleýmettik saladaǵy, áielderdi kemsitýmen kúresýdegi rólin joǵarylatý boiynsha Qazaqstan Respýblikasynyń Úkimetimen, Parlamentimen jáne úkimettik emes sektorlarymen ortaq qabyldanǵan amaldary týraly baiandamasyn usyndy.
Delegatsiia músheleri Komitet sarapshylarynyń suraqtaryna jaýap berdi jáne Qazaqstandaǵy áielderdiń quqyqtary men múmkindikterin keńeitý boiynsha negizgi ózgerister týraly aqparat usyndy, onyń ishinde:
- genderlik saiasatty iske asyrý boiynsha is-qimyldy úilestirý tetikterin ázirleý;
- barlyq saladaǵy áielderdiń úlesin ulǵaitý;
- biznes ashýǵa, onyń ishinde aýyl áielderine arnalǵan memlekettik qoldaý sharalaryn keńeitý;
- áielderdi zorlyq-zombylyqtan qorǵaý jáne t.b.
Komitet músheleri ózderiniń suraqtary men pikirlerinde Qazaqstannyń Konventsiiany iske asyrý máselelerinde alǵa jyljyǵanyn atap ótti.
Dúniejúzilik ekonomikalyq forýmnyń baǵalaýy boiynsha Qazaqstan 2018 jyly genderlik alshaqtyq reitingi boiynsha 149 eldiń ishinde 60-shy orynǵa ie boldy, onyń ishinde bilim alý boiynsha – 30-shy, áielderdiń ekonomikalyq múmkindikterin júzege asyrý boiynsha – 32-shi orynda. BUU Damý baǵdarlamasynyń adami damý jónindegi esebine sáikes Qazaqstan 2018 jyly Genderlik damý indeksi boiynsha 58-shi orynǵa ie boldy
Komitettiń otyrysy qarsańynda genderlik teńdik máselelerine basa nazar aýdara otyryp, Prezident Q.K.Toqaevtyń Joldaýy talqylanǵan dóńgelek ústel ótkizildi. Is-shara barysynda G.N.Ábdiqalyqova, Qazaqstannyń BUU janyndaǵy Turaqty Ókili J.S.Aitjanova, BUU Jenevadaǵy bólimshesiniń bas direktory T.D.Valovaia, sonymen qatar Braziliianyń, Koreianyń, Ońtústik Afrikanyń, Tailandtyń turaqty ókilderi sóz sóiledi.
Aita keteiik, áielderge qatysty kemsitýshilikti joiý jónindegi komitet (ÁKJK) qatysýshy-memleketterdiń Áielderge qatysty kemsitýshiliktiń barlyq túrlerin joiý týraly konventsiiany oryndaýyn baqylaityn táýelsiz sarapshylar organy bolyp tabylady. Kelisim-sharttyń qatysýshylary bolǵan elder tórt jylda bir ret Komitetke sáikes quqyqtardy júrgizgeni týraly baiandamalaryn usynýǵa mindetti. Komitet óziniń sessiialary kezinde ár qatysýshy-memlekettiń baiandamasyn qarastyrady jáne olarǵa qorytyndy eskertýler túrinde óz oilary men usynymdaryn jetkizedi. ÁKJK álemniń barlyq jerinen kelgen áielder quqyǵy jónindegi 23 sarapshylardan turady.
