Birikken Ulttar Uiymynyń Bosqyndar jónindegi agenttigi (BUU BJKB) Aýǵanstanmen kórshi elderdi shekarany ashyq ustaýǵa shaqyryp otyr. Óitkeni Aýǵanstannyń edáýir bóligin basyp alǵan "Taliban" radikaldy qozǵalysy belsendi is-qimylyn erekshe qarqynmen údetip jatyr.
"Biz gýmanitarlyq apat qarsańynda turmyz. Qaýipsiz baspananyń joqtyǵy sansyz beibit turǵynnyń ómirine qaýip tóndirýi múmkin. BUU BJKB Aýǵanstanmen kórshi elder úkimetterine qajet bolǵan jaǵdaida gýmanitarlyq shara aýqymyn keńeitýge kómektesýge daiyn" dep málimdedi BUU BJKB ókili Shabiia Mantoo 13 tamyzda Jenevada ótken baspasóz brifinginde.
BUU ókili bul málimdemesin Aýǵanstanda myńdaǵan er jáne áiel men balalar "Taliban" qozǵalysynyń qarýly belsendiligi artqan shaqta bassaýǵalap jan-jaqqa qashyp jatqanda jasady. Sonymen bir mezette BUU Dúniejúzilik azyq-túlik baǵdarlamasynyń baspasóz ókili Aýǵanstan halqynyń úshten bir bóligi azyq-túlikke qoly jetpei qinalýy múmkin ekenin eskertti.
"Eki million bala shuǵyl kómekke zárý. Biz budan da ótken, eń soraqy jait áli alda ma dep qorqamyz" dedi atalǵan BUU baǵdarlamasynyń ókili Tomson Firi.
Firi 2021 jyldyń sońyna deiin adamdardy ashtyqtan qutqarýǵa 200 million dollar qajet bolatynyn aitty.
BUU deregi boiynsha, jyl basynan beri shamamen 390 myń adam qonys aýdarýǵa májbúr bolǵan. Biraq is júzinde ondai adamdardyń sany budan áldeqaida kóp bolýy múmkin.
13 tamyzda halyqaralyq jetekshi gýmanitarlyq kómek berý uiymdarynyń biri Aýǵanstanda alda bolatyn "úlken gýmanitarlyq daǵdarysqa ázirlenip jatqanyn" málimdegen.
