BUU-nyń Bosqyndar isteri jónindegi Joǵarǵy komissary basqarmasy (BJKB) Aýǵanstanǵa gýmanitarlyq daǵdarys jaqyndap kele jatqan týraly eskertti. Uiym boljamynsha qaqtyǵystyń ýshyǵýy túrli jaǵdailar men beibit turǵyndardyń jappai qonys aýdarýyna ákep soqtyrady, dep habarlaidy BUU Jańalyqtar ortalyǵy.
Tek 2021 jyldyń qańtarynan bastap shamamen 270 myń aýǵan azamaty úilerin tastap ketýge májbúr boldy. Qazirgi ýaqytta eldegi ishki bosqyndardyń jalpy sany 3,5 millionnan asty. Sońǵy aptalarda Aýǵanstanda qaýipsizdik ahýalynyń nasharlaýy baiqalýda, kóptegen otbasynyń qaýipsiz jer izdep qashýdan basqa amaly qalmady.
Qonys aýdarǵan azamattyq tulǵalar BJKB men onyń seriktes uiymdaryna qarýly qaqtyǵystar týraly, memlekettik emes qarýly toptar tarapynan bopsalaý jaǵdailary týraly jáne negizgi joldardaǵy qoldan jasalǵan jarylǵysh qurylǵylar týraly habarlaidy. Urys júrip jatqan aýdandarda áleýmettik kómek qyzmetteri jumysyn toqtatyp jatyr, adamdar jumysynan aiyrylýda.
BUU-nyń Aýǵanstanǵa járdemdesý jónindegi missiiasynyń derekteri boiynsha osy jyldyń birinshi toqsanynda azamattyq turǵyndar arasyndaǵy qurbandar sany 2020 jylmen salystyrǵanda 29 paiyzǵa artqan. Olardyń arasynda áielder men balalar kóp.
Kenetten qashýǵa májbúr bolǵandarǵa qoldaý qajet. BJKB jáne onyń seriktesteri úilestirilgen sharalar aiasynda qonys aýdarǵan aýǵandarǵa baspana jáne aqshalai kómek beredi, olardy azyq-túlikpen, sýmen qamtamasyz etedi, sondai-aq olarǵa meditsinalyq qyzmetter kórsetedi.
Uzaqqa sozylǵan qaqtyǵys, qonys aýdarýǵa májbúr bolǵan adamdar sanynyń ósýi, COVID-19, jii kezdesetin tabiǵi apattar, sonyń ishinde qurǵaqshylyq, kedeilik aýǵan halqynyń shydamdylyǵynyń shegine jetti.
