Burynǵy densaýlyq saqtaý vitse-ministri Erik Baijúnisovke qatysty qylmystyq is toqtatyldy, - dep habarlaidy Tengrinews.kz tilshisi Sybailas jemqorlyqqa qarsy is-qimyl agenttigine silteme jasap.
"2021 jylǵy 15 jeltoqsanda osy qylmystyq is Qazaqstan Respýblikasy Qylmystyq is júrgizý kodeksiniń 35-baby 1-bóligi 1-tarmaǵyna sáikes, qylmystyq quqyqbuzýshylyq quramynyń bolmaýyna bailanysty toqtatylǵanyn habarlaimyz", - delingen tilshiniń saýalyna bergen resmi jaýapta.
Eske salaiyq, 2020 jyldyń qyrkúieginde burynǵy densaýlyq saqtaý vitse-ministri, "Dárilik zattardy saraptaý ulttyq ortalyǵy" ulttyq memlekettik kásipornynyń bas direktory Erik Baijúnisovke qatysty birneshe ret para aldy degen kúdikke bailanysty úiqamaq túrindegi bultartpaý sharasy qoldanylǵany habarlanǵan bolatyn.
