Foto: facebook.com/Nýrjan Altaev
Qamaýǵa alynǵan Nurjan Áltaev "Atameken" UKP basqarma tóraǵasy Abylai Myrzahmetovten para retinde ai saiyn 5 000 dollar alyp kelgen, dep habarlady "Ult aqparat" Antikor baspasóz qyzmetine silteme jasap.
"Biyl 7 maýsymda Sybailas jemqorlyqqa qarsy qyzmet jasyryn is-sharalar kesheniniń nátijeleri boiynsha eks-vitse-ministr N.B. Áltaevty asa aýyr jemqorlyq qylmys jasady degen kúdikpen ustady.
N.B. Áltaev 2018-2019 jyldar aralyǵynda QR Eńbek jáne halyqty áleýmettik qorǵaý vitse-ministri bola tura, júieli túrde «Atameken» UKP Basqarma tóraǵasy A.I. Myrzahmetovten para retinde ai saiyn 5 000 AQSh dollary mólsherinde aqsha qarajatyn alyp otyrdy dep kúdiktenedi" - delingen habarlamada.
Vedomstvo málimetinshe, keiinnen Áltaev 2019-2020 jyldar aralyǵynda Parlament Májilisiniń depýtaty laýazymyn atqara otyryp, Myrzahmetovten para alý boiynsha óziniń sybailas jemqorlyq qyzmetin jalǵastyrǵan.
"Jalpy alǵanda, ol para retinde 135 000 AQSh dollaryn aldy. Bul asa iri kólem bolyp sanalady. Para Nátijeli jumyspen qamtýǵa jáne jappai kásipkerlikti damytýǵa arnalǵan «Eńbek» memlekettik baǵdarlamasy boiynsha memlekettik tapsyrysty alýǵa járdemdesýge, sondai-aq Myrzahmetov jetekshilik etetin Áltaev salalaryndaǵy múddelerdi jalpy qamqorlyqqa alýǵa jáne lobbizm jasaýǵa arnalǵan.
Ol jasaǵan qylmys jasyryn tergeý áreketteriniń nátijelerimen, tiisti qujattarmen, zattai dáleldemelermen, barlyq qatysy bar adamdardyń aiǵaqtarymen jáne istiń basqa materialdarymen rastalady.
Jinalǵan dáleldemelerdi eskere otyryp, prokýratýra organdarynyń kelisimi boiynsha Áltaevtyń áreketteri QR QK 366-baby 4-bóligi boiynsha saralandy. Áltaev Astana qalasy Politsiia departamentiniń ýaqytsha ustaý izoliatoryna qamaldy. Bultartpaý sharasy boiynsha másele sheshilip jatyr", - delingen habarlamada.
QR QPK 201-babyna sáikes tergeý múddesi úshin ózge aqparat jariia etýge jatpaidy. Konstitýtsiianyń 77-baby 3-tarmaǵynyń 1-tarmaqshasyna jáne Qylmystyq-protsestik kodeksiniń 19-baby 1-bóligine sáikes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deiin árbir adam kinásiz dep esepteledi.
