Foto: Gov.kz
Burynǵy Melioratsiia jáne sý sharýashylyǵy ministri Nariman Qypshaqbaev Kókaral bógetin 2 metrge kóterýdi usynyp otyr. Sý sharýashylyǵy salasynyń ardageri Soltústik Aral teńizin saqtaýdyń óz nusqasyn tanystyrdy. Onyń aitýynsha, Kishi Aralǵa 30 mlrd tekshe metrden artyq sý jinalmaidy, dep habarlaidy Ult.kz.
«Kishi Aralǵa 51 mlrd tekshe metr sý jinaý múmkin emes. Sý mol kelgenniń ózinde 30 mlrd-tan artyq jinai almaimyz. Sebebi, Syrdariianyń jalpy sý kólemi 37 mlrd tekshe metr. Búgingi tańda ózen boiyndaǵy 4 memlekettiń sýǵa degen suranysy 3 ese artyp ketti. 100 mlrd sý surap otyr. Halyq sany kóbeiip jatyr, jańadan zaýyt-fabrikalar salynýda, eldi mekender boi kóterýde. Odan artyq sý keledi degen bos áńgime»,- dedi burynǵy sý sharýashylyǵy ministri Nariman Qypshaqbaev.
Sý salasynyń ardageri Syrdariia ózeniniń sý kólemi turaqty emes ekenin de aitady. Tipti 4-5 jyl qatarynan sýy az jyldar tsikli qaitalanyp otyrǵan.
«Men «Kishi Aral» jobasyn 1988 jyly bastaǵanmyn. 2006 jylǵa deiin Aral teńizinen bir de bir shabaq aýlanǵan joq. Balyqshylardyń bári jan-jaqqa kóship ketti. Biz 12 shaqyrym bógetti salǵaly teńizdiń sý tushylanyp, qazir jylyna 8-10 tonna balyq aýlaityn boldy. Aral qalasynda 8 balyq zaýyty salyndy. Iaǵni, bóget óziniń kerek ekenin dáleldedi. Endi tek sol bógetti 2 metrge kóterip, beriktigin nyǵaitý kerek»,- dedi Qazaqstannyń Eńbek sińirgen gidrotehnigi.
Eske salsaq, búgingi tańda Sý resýrstary jáne irrigatsiia ministrligi Soltústik Aral teńizin saqtaý jobasynyń birneshe nusqasyn pysyqtaýda. Osyǵan qatysty Aral aýdanynyń turǵyndarymen qoǵamdyq talqylaýlar ótti. Jobany iske asyrý Soltústik Araldyń saqtalýyna, sýdyń tuzdylyǵynyń tómendeýine jáne teńiz basseinindegi ekologiialyq jaǵdaidyń jaqsarýyna yqpal etedi.
